Монгол Улсад өмнө нь бүртгэгдэж байгаагүй шүлхийн “САТ-1” өвчин Ховд, Баян-Өлгий аймгийн дөрвөн суманд дэгдээд байгаа билээ. Малыг халдваргүйжүүлэх тус өвчний эсрэг вакцин одоогийн байдлаар манай улсад байхгүй байна. Тиймээс өвчин хурдацтай тархаж байгааг мэргэжлийн хүмүүс онцолж байлаа. Одоогийн байдлаар САТ-1 өвчнөөр хэчнээн мал өвчилж, устгалд оруулсныг мэргэжлийн хүмүүсээс тодрууллаа. 

Баян-Өлгий аймгийн Мал эмнэлгийн газрын мэргэжилтэн Б.Габидэн: БНХАУ-ЫН ШИНЖААН УЙГАРААС САТ-1 ӨВЧИН ЗЭРЛЭГ АМЬТНААР ДАМЖИН ХАЛДВАРЛАСАН БАЙЖ БОЛЗОШГҮЙ 

        Баян-Өлгий аймгийн Алтай сумын нэгдүгээр багийн нутаг Хужирт хэмээх газар тавдугаар сарын 22-нд шүлхий өвчний тохиолдол илэрсэн. Улмаар аймгийн мал эмнэлгийн газраас үзлэг шинжилгээ хийж, Улсын мал эмнэлгийн ариун цэврийн лаборатори руу илгээхэд Монголд өмнө нь бүртгэгдэж байгаагүй шүлхий өвчний САТ-1 хэв шинж болох нь батлагдсан байна. Одоогоор аймгийн хэмжээнд хэчнээн мал өвчлөөд байгааг Баян-Өлгий аймгийн Мал эмнэлгийн газрын мэргэжилтэн Б.Габидэнээс тодрууллаа. Тэрбээр “Баян-Өлгий аймгийн Дэлүүн, Алтай суманд шүлхий өвчний таван голомт бүртгэгдсэн. Одоогийн байдлаар 847 мал өвчилж, 1323 малыг устгалд оруулсан. Үүнд нэг тэмээ, 1040 үхэр, 132 хонь, 145 ямаа, таван нохойг устгалд оруулсан. Мөн голомтын бүсэд буюу эрсдэлтэй бүсүүдэд пост гаргаж, орон нутгуудийн орох, гарах хөдөлгөөнийг хязгаарласан. Шүлхийн САТ-1 хэв шинж нь өмнө нь манай улсад бүртгэгдэж байсан АО хэв шинжтэй ижил шинж тэмдэг илэрдэг. Тус өвчин нь БНХАУ-тай хиллэдэг сумдаар тархсан учир зэрлэг ан амьтнаар дамжиж Шинжаан Уйгараас орж ирсэн байж болзошгүй хэмээн үзэж байгаа. Мөн тус өвчний эсрэг вакцин манай улсад байгаагүй учир БНХАУ-руу захиалсан байгаа. Энэ долоо хоногт вакцин ирж, малыг бүрэн вакцинжуулснаар тус өвчнөөс салах боломжтой. Мөн саяхан Хөдөө аж ахуйн сайд баруун аймгуудаар явахдаа ОХУ-аас вакцин захиалсан гэдгээ илэрхийлсэн” гэв. 

ХОВД АЙМГИЙН МЭРГЭЖИЛТЭН Х.АЛТАНТУЯА: 1074 МАЛ ӨВЧИЛЖ, 946-Г УСТГАСАН 

        Харин ховд аймгийн ЗДТГ-ын хэвлэл мэдээлэл, олон нийттэй харилцах хэлтсийн мэргэжилтэн Д.Алтантуяагаас нөхцөл байдлын талаар тодрууллаа. Тэрбээр “Одоогийн байдлаар аймгийн хэмжээнд 1074 мал САТ-1 өвчнөөр өвчилж, 946 малыг устгалд оруулсан. Өвчин гарсан сумдын орох, гарах хөдөлгөөнийг бүрэн хязгаарлаж, эмнэлгийн тусламж үйлчилгээ авах шаардлагатай хүмүүсийн машиныг бүрэн ариутгаж байгаа. Мөн нүүрс тээвэр хэвийн үргэлжилж байгаа. Харин хүдрийн тээвэрлэлтийн түр зогсоосон. Аймгийн хэмжээнд найман газар пост гаргаж, иргэдийн хөдөлгөөнийг хянаж, өвчин тархахаас урьдчилан сэргийлэх арга хэмжээг өдөр бүр авч байгаа” гэв. 

УВС АЙМГИЙН МАЛ ЭМНЭЛГИЙН ГАЗРЫН ДАРГА: МАНАЙ АЙМАГ НАЙМДУГААР САРЫН 1 ХҮРТЭЛ ОЛОН НИЙТИЙН АРГА ХЭМЖЭЭ ЗОХИОН БАЙГУУЛАХГҮЙ 

      Ховд, Баян-Өлгий, Говь-Алтай аймагт шүлхий өвчний SAT-1 хэвшил бүртгэгдсэнтэй холбогдуулан Увс аймагт урьдчилан сэргийлэх арга хэмжээг авч хэрэгжүүлж байна. Энэ хүрээнд шүлхий өвчний халдвараас урьдчилан сэргийлэх зорилгоор дараах олон нийтийг хамарсан арга хэмжээг наймдугаар сарын 1-нийг хүртэл зохион байгуулахыг хязгаарлалаа.

Үүнд:

-Овооны баяр

-Ургийн баяр

-Баяр наадам

-Хурдан морины уралдаан

-Бооцоот адуучин

-Бусад олныг хамарсан арга хэмжээ

-Мөн аймаг, сум хооронд мал, амьтны шилжилт хөдөлгөөн хийхийг тодорхойгүй хугацаагаар хязгаарлаж байна.

Түүнчлэн, Ховд аймаг руу зорчих иргэд сумын Засаг даргын Тамгын газарт хүсэлт гарган, зөвшөөрлийн хуудас бөглөж зорчих боломжтой. Мөн Баян-Өлгий аймаг руу зорчих хөдөлгөөнийг тодорхойгүй хугацаагаар хориглож байна.