-Д.СОВД НЬ БШУЯ, ХХААХҮЯ-НД ГАЗРЫН ДАРГААР АЖИЛЛАЖ БАЙСАН, 2020 ОНД ХӨВСГӨЛ АЙМГААС УИХ-Д БИЕ ДААН НЭР ДЭВШИЖ БАЙЖЭЭ-

       УИХ-ын гишүүн, БШУ-ны сайд Л.Энх-Амгалангийн амь насанд заналхийлсэн ноцтой хэрэг өнөөдөр буюу 2021 оны тавдугаар сарын 22-ны өдрийн 16:40 цагийн орчимд гарчээ. Л.Энх-Амгалан сайд руу З.Совд гэгч залуу дайрч, нүүрэнд нь цохиж, хутгалах гэж оролдсон гэнэ. Энэ талаар албаны эх сурвалжаас авсан мэдээллээр УИХ-ын гишүүн, БШУ-ны сайд Л.Энх-Амгалан ШУА-ийн харьяа Шинжлэх ухааны хүрээлэнгүүдээр явж, ажилтай нь танилцсан байна.  Ингээд яамны гадаа ажлын хэсгийнхэнтэйгээ уулзаж, хэсэг зогссон  байна. Үүний дараа машин руугаа явах үед тус яамны хашаан дахь модны  араас нэгэн хүн гарч ирсэн гэнэ. Ингээд сайдтай хэсэг уулзаж байгаад нүүр рүү нь цохиж, хутгалах гэж оролджээ. Үйл явдал өрнөх үед сайдын зөвлөх болоод яамны ажилтнууд халдлагыг таслан зогсоож, Д.Совдыг араас нь тэвэрч авчээ. Ингээд цагдаа дуудаж, түүнийг саатуулсан гэнэ.

САЙД Л.ЭНХ-АМГАЛАНГААС ХОХИРОГЧИЙН МЭДҮҮЛЭГЧ АВЧЭЭ

            Өөр эх сурвалжийн бидэнд өгсөн мэдээллээр “Нийслэлийн шуурхай удирдлагын төвийн утсанд Боловсрол шинжлэх ухааны яамны үүдэнд үл таних этгээд бусдыг хутгалах гэж оролдлоо. Яаралтай ир” гэсэн утга бүхий дуудлага өгсөн гэнэ. Дуудлагын дагуу Сүхбаатар дүүргийн цагдаагийн нэгдүгээр хэлтсийн цагдаа нар очсон байна. Ингээд  гэмт хэрэгтнийг саатуулж, хэргийн газарт үзлэг хийж, Л.Энх-Амгалан сайд руу дайрсан этгээдийн хутгыг эд мөрийн баримтаар хураан авчээ. Сайд Л.Энх-Амгалан болоод түүний зөвлөх, туслах ажилтан зэргээс хохирогч болон гэрчийн мэдүүлэг авсан байна. Мөн бусдын амь насанд халдах гэж оролдсон гэх үндэслэлээр З.Совд гэгчийг саатуулаад байгаа ажээ.   

БШУ-НЫ САЙД Л.ЭНХ-АМГАЛАНГ ХУТГАЛАХ ГЭЖ ОРОЛДСОН Д.СОВД ГЭЖ ХЭН БЭ

           Боловсролын яаманд газрын дарга, Хүнс хөдөө аж ахуйн яаманд мөн л  томоохон албан тушаал хашиж байсан тэрбээр өнгөрсөн 2020 оны УИХ-ын сонгуулийн үеэр Хөвсгөл аймагт нэр дэвшиж байсан Д.Совд гэгч дээрх хэргийг үйлдсэн байна. Д.Совд нь Хөвсгөл аймгийн харьяат юм байна. УИХ-ын гишүүн Ц.Даваасүрэнтэй тун ойр, түүний дэмжлэгтэйгээр яамдад томоохон албан тушаал хашиж ирсэн гэх мэдээлэл байгаа юм. Д.Совд нь сүүлийн хэд хоногт хүүхдүүдийг хүчээр вакцин хийлгэх гэж байгааг эсэргүүцэж, хэвлэл мэдээллийн хэрэгсэл болоод өөрийн цахим хуудсаараа дамжуулан олон нийтэд шүүмжлэлтэй мэдээлэл хүргэж байсан билээ. Мөн тэрбээр “Л.Энх-Амгалан сайд хүүхдүүдэд ковидоос урьдчилсан сэргийлэх вакцин хүчээр тарих гэж байна” гэх утга бүхий мэдээлэл олон нийтэд цацаад байсан юм.

          Өнгөрсөн онд “Хүннү Эйр” ХХК-ийн инженерийн үүрэг гүйцэтгэгч Мэргэншагай онгоц хучиж байгаад хальтирч унан хүнд бэртэл авсан. Тэрбээр ГССҮТ-д гавлын яс нь цуурсан оноштойгоор хэвтэн эмчлүүлж байсан. Дээрх осолтой холбоотойгоор  түүний ах болох Д.Совд хэд хэдэн удаа хэвлэлийн хурал зарлаж байснаараа олны анхаарлыг татаж байсан билээ.  

БШУ-НЫ САЙД НҮДНИЙ УХАРХАЙ ОРЧИМДОО БАГА ЗЭРГИЙН ГЭМТЭЛ АВЧ, НҮДНИЙ ШИЛ НЬ ХАГАРЧЭЭ

          Л.Энх-Амгалан сайдын нүдний шил Д.Совдод цохиулахдаа хагарсан гэнэ. Мөн нүдний ухархай орчимд нь бага зэрэг шалбарч, нүдний шилний жижиг хэмжээний боолт маханд нь шигдсэнээс өөр хүнд бэртэл гэмтэл байхгүй гэнэ. Хэргийг шалгаж байгаа цагдаа нарын үзэж буйгаар Д.Совд хувийн өс хонзонгийн үүднээс Л.Энх-Амгалан сайдын биед халдаж, улмаар амь насыг нь хөнөөх гэсэн үйлдэл гаргасан байж болзошгүй гэх гомдлын мөрөөр мөрдөн шалгаж байна. Д.Совдоос яг одоо мэдүүлэг авч байгаа гэнэ.