Дуучин С.Гантогоогийн дүүг сургуулийнх нь хүүхдүүд бүлэглэж, хоёр жилийн турш фэйсбүүк чатаар дарамтлаж, зодож, сүрдүүлж байсан хэрэг илэрчээ. Түүний дүү нэгэн сургуулийн ахлах ангийн сурагч бөгөөд сургуулийнх хүүхдүүд нийлж, зодож, дарамталж, мөнгө нэхдэг байсан гэнэ. Харин дуучин С.Гантогоо энэ асуудлаар цагдаагийн байгууллагад хандаж, шалгуулж байгаа аж. Мөн хэргийг прокурорт шилжүүлж, Эрүүгийн хэрэг үүсгэхээр болжээ.

Тэрбээр энэ талаар өөрийнхөө цахим хуудастаа “Ахлах ангид сурдаг үлгэр жишээ болсон хайртай дүү минь хоёр жилийн турш ангийнхаа хүүхдэд болон түүний нийлдэг 30-50 орчим бүрэлдэхүүнтэй бүлэг болсон мафижсан хүүхдүүдэд дээрэлхүүлж, зодуулж, заналхийлүүлж, мөнгө өгч, сэтгэл санааны гүн хямралд орж байсан байх юм.Зөвхөн манай дүү бус ангийнх нь сайн найз, хүүхдүүд хүртэл удаа дараа хохирч байсан гээд бод доо. Дүүгийнхээ энэ асуудлыг цагдаагийн байгууллагаар шалгуулж байгаа. Өнөөдрөөс хэрэг прокурорт шилжин, Эрүүгийн хэрэг үүсгэн шалгагдаж эхэллээ. Хэзээний хүчирхийлэгч болсон, дээрэлхүү, өрөвч сэтгэлгүй хүүхдүүд сургуулийн болон сошиал орчинд үеийнхээ найзууд, ангийнхаа хүүхдүүдийг заналхийлж, хүчирхийлж, сэтгэл санааны дарамт үзүүлж цаашлаад сургуульдаа очих дургүй,  сурах хүсэлгүй болгож айдас хүйдэст оруулж байна шүү дээ” гэж бичжээ. Мөн тэрбээр олон нийтийн сүлжээнд дүүгээ дарамтлуулдаг байсан баримт болох фэйсбүүкийн чатыг дэлгэсэн байна. Чатанд түүний дүү рүү “Охин олоод өг. Яг одоо гараад ир. Өөрийн гараар дуусгана” дэрэг харгислал дүүрэн үгс бичигджээ.