“Шүүх шинжилгээгээр архи, согтууруулах ундаа хэрэглэсэн гэсэн хариу гараагүй”

Угаарын хийн улмаас 54 настай эмэгтэй О нас барж, 55 настай эрэгтэй Т, 68 настай эрэгтэй Н нарын биеийн байдал хүнд, УНТЭ-т хэвтэн эмчүүлж байгаа. Уг хэргийн талаар сурвалжлахаар Чингэлтэй дүүргийг зорив.

Албан бус эх сурвалжийн хэлж байгаагаар угаартсан иргэд Чингэлтэй дүүргийн IX хороонд амьдардаг бөгөөд үүний дагуу тус хороо руу очлоо. Хорооны зохицуулагч эмэгтэй “Цагдаагийн байгууллага шалгаж байгаа учир нарийн мэдээлэл өгөх боломжгүй. Гэр нь Тасганы овоо чигтэй байдаг” гэв. Түүний ийн хэлсний дагуу ойр хавийн айлаас сураглаж явсаар талийгаачийн гэрийг олж, ойролцоох дэлгүүрийн эмэгтэйгээс уг хэргийн талаар асуутал

“Гэрт нь хүн байхгүй байх. Төрсөн ах болон нөхөртэйгөө гурвуулахнаа амьдардаг. Охин нь Японд ажил хийж байгаа. Өнгөрсөн жил явсан байх. Охинтойгоо цуг жижиг мухлаг ажиллуулж байгаад гадаад руу явснаас  нь хойш мухлагаа ажиллуулахаа больсон. Талийгаач энд амьдраад удаж байгаа. Бид ойрхон амьдардаг учир манай дэлгүүрээр байнга орж ирдэг юм. Нас барсан шалтгааныг нь угаарийн хийн улмаас гэж тогтоож байна лээ” гэв.

Талийгаачийн гэрт нь очтол хашаанд нь хоёр эсгий гэр байх бөгөөд түүний амьдардаг байсан гэрийн өрх нь татаастай, тоононынх нь цонх сааралтаж харагдав. Гэр бүлийнхэн нь байхгүй байлаа. Хашаанд нь түрээслэн суудаг айлын 30 эргэм насны эмэгтэй Ю бидэнд хаалга тайлсан юм. Тэрбээр “Гэрийнхэн нь уржигдар ирсэн. Одоо байхгүй байна. Бүгд шүүх эмнэлэг рүү явцгаасан. Уржигдар орой 18.00 цаг өнгөрч байсан байх. Тэр үеэр түргэний машин ирэхэд талийгаач нас барсан байсан.

Түргэний эмч нар юу гэж хэлснийг сайн мэдэхгүй байна. Том ах нь нөхөр болон ахыг нь сахиж байгаа. Тухайн үед архи, согтууруулах ундаа хэрэглэсэн эсэхийг нь анзаараагүй. Бага зэрэг уудаг ч байнга бол биш. Би гэр бүлтэйгээ хамт хашааг нь түрээслэж суудаг. Эднийх ганц охинтой. Талийгаач өөрөө ажил хийдэггүй. Гэртээ суудаг. Ирэх даваа гарагт талийгаачийг гаргана гэсэн” гэв. Одоогоор талийгаачийн нөхөр болон төрсөн ахынх нь биеийн байдал хүнд УНТЭ-ийн Сэхээн амьдруулах тасагт хэвтэн эмчлүүлж байгаа.

Уг хэргийн талаар Нийслэлийн онцгой комиссоос өнөөдөр мэдээлсэн бөгөөд тэр үеэр НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй “Өчигдөр буюу энэ сарын 21-нд Чингэлтэй дүүрэгт 54 настай эмэгтэй О, 68 настай эрэгтэй Н, 55 настай эрэгтэй Т нар угаарын хийд хордлоо гэх дуудлага өгсөн. Тэд тухайн үед согтууруулах ундаа хэрэглэсэн байсан учраас Цагдаагийн байгууллага шалгаж байгаа” гэсэн юм.

Тэгвэл талийгаачийн гэр бүлийн эмэгтэй “Шүүх шинжилгээгээр архи, согтууруулах ундаа хэрэглэсэн гэсэн хариу гараагүй. Төрсөн ах болон нөхрийнх нь нэг нь дуудлага өгсөн юм билээ. Биднийг гэрт нь очиход өрх нь бүтээлттэй байсан” гэсэн юм.

Шахмал түлшийг хэрэглээнд нэвтрүүлээд жил гаруйн хугацаа өнгөрч байгаа бөгөөд өдийг хүртэл цөөнгүй олон хүн амь, амьдралаа золионд гаргав. Угаартсан иргэдийн нас барсан шалтгааныг холбогдох мэргэжилтнүүд өрхөө бүтээсэн, яндангаа авсан гэх зэргээр тайлбарлаж байгаа. Гэвч түүхий нүүрс хэрэглэдэг байсан үед иргэд өрхөө бүтээсэн ч, яндангаа авсан ч нүүрсний утаа униар, угаарт амиа өгдөггүй байлаа.

Мөн гэр хорооллын иргэд гал түлэх туршлагагүй, аль эсвэл цэцэрлэгийн хүүхдээр галаа түлүүлж байгаа зүйл биш юм. Харин шахмал түлш хэрэглээнд нэвтэрснээс хойш олон иргэн угаарын хийн улмаас нас барж байгаа нь өрхөө бүтээсэн эсэхдээ гол биш, шахмал түлшинд гол асуудал байгааг илтгэж байгаа юм.