А.ХУЛАН: Хөөрхөн чихмэл бүтээхийн тулд нэхэхдээ хамгийн сайхан зүйлсээ боддог

О. Эрдэнэтунгалаг:
Эдийн засаг- Эх орондоо үйлдвэрлэв

2022-11-20, 618

Хүүхэд насны гэгээхэн дурсамжийг хөглөх чихмэл тоглоомыг илүү нандин санагдуулах нэхмэл тоглоомыг А.Хулан урладаг. Гэртээ хүүхдээ харах хугацаандаа нэмэлт орлоготой болох гэж нэхмэл тоглоом эхэлсэн тэрбээр ирээдүйд ажлын байр бий болгосон гарааны бизнестэй болох зорилт тавин ажиллаж байна.

-Танд энэ өдрийн мэнд хүргэе. Таны нэхсэн хөөрхөн чихмэлүүдийг хараад хийж эхэлсэн үеийг нь хамгийн эхэнд мэдмээр санагдсан?

-Жилийн өмнөөс нэхмэл сонирхож, хийж эхэлсэн. Байнгын ажилтай байсан хүн хүүхэд гаргаж гэртээ суух үеэр яах аргагүй өөрийн гэсэн орлоготой болмоор санагдаж, эрэлхийлдэг шүү дээ. Яг тийм л эрэл хайгуултай юуг ч хийчихмээр санагдаж байх үед эгч маань нэхмэл хүүхэлдэй хийхийг санал болгосон. Тэр хүний “Чи хийж чадна” гэж итгэл өгсөн нь надад урам болсон.

-Нэхмэл хүүхэлдэйг энгийн нэхмэлийн утсаар хийдэг үү, өөр төрлийн утас шаардагддаг уу?

-Хүүхэд байнга тэвэрч, хүрч байхад өнгө алдахгүй, бат бэх орц найрлагатай утсаар чихмэлүүдээ нэхдэг. Монгол Улсад харьцангуй элбэг зарагддаг.

-Бүх хүүхэлдэйгээ өөрөө хийж байгаа юу. Загваруудаа хэрхэн гаргадаг вэ?

-Одоогийн байдлаар ирсэн бүх захиалгаа ганцаараа хийж байгаа. Загварын хувьд одоогийн байдлаар гадаад нэхмэл урлаачдын загвараар хийгдэж байгаа. Оёх дараалал схемтэй загварууд гэсэн үг л дээ. Зарим схемийг нь өөрчилж, илүү гоё харагдах тал дээр нь анхаардаг. Өөрөө загвараа гаргаж хийхэд багадаа 14 хоног шаардлагатай болдог.

-Хэр урт хугацаанд нэхэж бэлэн болдог вэ?

-Тухайн хийгдэж байгаа хүүхэлдэйнээсээ шалтгаалаад цаг хугацааны хувьд өөр байдаг. Заримдаа нэг өдрийн дотор дуусна. Бүүр нарийн чимхлүүр ажил ихтэй хүүхэлдэй 7-14 хоногт нэхэгддэг. Би хүүхдээ харангаа давхар хийдэг учраас миний чөлөөт цагаас ч шалтгаалдаг.

-Гарааны бизнес эхлүүлэхэд шаардлагатай суурь хөрөнгөө хэрхэн бүрдүүлж ажилласан бэ?

-Би нэхмэл тоглоомыг их хурдан хийж сурсан. Эхний тоглоомоо хийж үзээд “Болох юм байна” гэсэн урам авсан. Тэгээд хоёр дахь тоглоомоосоо эхлээд шууд захиалга авч эхэлсэн. Миний хувьд хэрэгтэй түүхийн эдээ захиалга авах үедээ 100% төлүүлээд тэндээсээ нэхмэлийн утсаа авдаг байлаа. Ингээд бага багаар утас цуглуулаад түүхийн эдийн нөөцтэй болж байгаа юм.

-Бүх ажиллагаагаа гарын чимхлүүр ажил шаардах юм байна. Олон хүүхэлдэй нэхэхэд гар өвдөх үе гардаг болов уу?

-Анх хийж байгаа хүмүүсийн хувьд гар нь их чилж өвддөг. Тасралтгүй бугуйгаа хөдөлгөж байгаа учраас тэр л дээ. Гэхдээ сүүлдээ дасдаг юм билээ.

-Өмнө нь нэхмэл хүүхэлдэй хийж болдог талаар мэддэг байсан уу?

-Нэхмэлийн талаар бага зэргийн ойлголттой байсан. Хувцас малгай, ороолтыг л нэхэж хийдэг гэж боддог байлаа. Тэгсэн тоглоомыг хүртэл нэхэж хийж болдог байсан.

-Нэхмэлийн сургалт зохион байгуулдаг юм билээ. Хэдэн хүнд нэхмэл хийхийг зааж өгсөн байна?

-Өнөөдрийн байдлаар 800 гаруй хүнд нэхмэл хийхийг зааж өгсөн байна. Ихэвчлэн ээжүүд миний сургалтад суудаг. Анхнаасаа гэртээ хүүхдээ хардаг ээжүүд рүү чиглэсэн сургалт байсан болохоор тэр юм болов уу. Дараа нь ерөнхий боловсролын сургуулийн сурагчид маань их хамрагддаг. Гар утаснаас холдуулж шинэ хоббитой болгох гэсэн ээжүүд манай сургалтад ханддаг. Мөн аавууд ч их идэвхтэй сурдаг.

-Гар урлал учраас илүү нандин байдаг байхдаа?

-Бүх ажлыг нь би өөрөө хийдэг учраас надад илүү үнэ цэнтэй. Хийж байх үедээ огтхон ч муу зүйл боддоггүй. Миний нэхсэн тоглоомыг аваад баярлах хүүхдүүдийг төсөөлж, үргэлж сайн сайхан зүйл бодож хийдэг.

-Хамгийн анхны нэхсэн хүүхэлдэй болон анхны захиалгынхаа талаар дурсахгүй юү?

-Хамгийн анхны захиалгаа их догдлолтойгоор хийсэн. Туулайны захиалга байсан юм. Анхны нэхмэлээ охиндоо бэлэглэж байлаа. Тал талаас нь зургийг нь дараад л, тэвэрч хүрч үзээд, өөртөө ч итгэхгүй байсан.

-Монгол Улсад энэ төрлийн бизнес эхлүүлэхэд хэр таатай нөхцөлтэй байна вэ?

-Ер нь ямар ч бизнесийн зөв чиглүүлж, зөв сурталчилгаа хийж чадвал амжилт олдог. Миний хувьд эхлүүлсэн бизнес маань таатайгаар хөгжиж байгаа гэж харж байгаа.

-Таны хувьд ямар мэргэжилтэй вэ. Цаашдаа нэхмэл хүүхэлдэйгээ хийж, ажиллах уу?

-Би инженер мэргэжилтэй. Нэхмэл хүүхэлдэйгээрээ үргэлжлүүлэн ажиллахаар бэлдэж байгаа. Холын, ойрын зорилго тавин ажиллаж байна. Ирээдүйд ажлын байр бий болгож, гэртээ хүүхдээ хараад суудаг ээжүүдийг ажилтай орлоготой болгож, өөрийн урлантай болохыг зорьж байна.

-Ярилцсанд баярлалаа.

-Баярлалаа.