УИХ дахь Ардчилсан намын бүлгийн 13 гишүүн талбай дээр өлсгөлөн зарлаад долоо хонож байна. Өнөөдрийн байдлаар өлсгөлөн зарлаж буй зарим гишүүнийн биеийн байдал муудаж, А.Адъяасүрэн, Д.Ганбат нар өлсгөлөн зарлах боломжгүй болсон.

Өлсгөлөнгөө үргэлжлүүлж буй Ж.Батсуурь гишүүнээс биеийн байдлыг нь тодруулахад “Бүлээн усаар л гол зогоож байна шүү дээ. Гэхдээ зорилгодоо хүрэхийн тулд “Бие өвдлөө” гэж гонгиноод баймааргүй байна. Эмч нар үзэж, сэтгэлзүйгээр дэмжиж байгаа. Учиргүй эм, тарианд орсон юм алга. Би энгийн үедээ ч их амархан жин хасдаг. Одоогоор өлсгөлөн зарлаж буй гишүүдээс хамгийн их жин хассан нь би байна. Зургаан кг жин хаслаа.

Өлсгөлөн зарлаад үр дүнд хүрэх эсэх нь тодорхойгүй байна. Түүнийг эрх баригч нар л шийдэх болов уу.

Манай улс парламентын засаглалтай. Гэтэл УИХ-ын чуулган дээр үг хэлүүлэхгүй байна. Хоёрхон минутад юу хэлж чадах вэ. Хүний эрх байхгүй болсон байна. Бороо, цас орж байхад бид нар гялгар уутан дор амьдарч байна. Гэтэл “Шударга тав” гарч ирээд таван ханатай гэр, тавилгатай нь бариулаад, дүрэлзтэл гал түлж, түүнийгээ тэмцэл гээд үр дүнд нь УИХ-ын дарга, Ерөнхий сайд болсон байна. Харин бид нарт цаасан хайрцаг ч өгөхгүй байна шүү дээ. Мөн хэвлэл мэдээллийнхэн ирэхгүй болохоор мэдээлэл хүргэж чадахгүй. Утсаараа шууд дамжуулалт хийх гэхээр, цэнэглэгч хурааж аваад, өгөхгүй. Бидний өлсгөлөн ийм л байна” гэлээ.