АН-аас цаг үеийн асуудлаар мэдээлэл хийлээ. Энэ үеэр АН-ын ҮБХ-ны гишүүн О.Чулуунбилэг "Н.Алтанхуяг ард түмний нэр барьж бусдын амь насанд заналхийлнэ гэдэг болчимгүй үйлдэл. Шулуухан хэлэхэд үр хүүхдээ хураад, залууст сургаал айлдаад байж байх ёстой хүн залуусыг заналхийлж, бусдыг дүүжлэх тухай яриад байна. Энэ бүх болчимгүй үйл явдлыг Ардчилсан нам хариуцахгүй. Хэн нэгнийг алах, дүүжлэх, шатаах тухай ярьж байгаа бүх хүмүүс өөрсдөө хариуцлага хүлээх ёстой. СЕХ-ны шийдвэр гарсан учир настай улс төрчид дотоод тэмцлээ больмоор байна. Нийгмээ бусармаг зүйлд залуусыг бүү уруу тат гэж хэлье" гэлээ. Харин АН-ын нарийн бичгийн дарга Ч.Өнөрбаяр "СЕХ өчигдөр АН-аас Ерөнхийлөгчийн сонгуульд нэр дэвшигчийн мөрийн хөтөлбөрийг хүлээж авсан. Тийм учраас сонгуулийн сурталчилгааны бэлтгэл ажил руу удахгүй орно. Сүүлийн үед манай намын дарга байсан хүмүүс ардчиллын эсрэг хөдлөх боллоо. Өнөөдөр нэг дарга нь хүрч ирээд "Надад тохирсон том албан тушаал өгвөл хийе, үгүй бол хийхгүй" гэх хариуцлагагүй үйлдэл гаргаж байна" гэв.