Үндсэн хуулийн цэцийн дунд суудлын хуралдаан үргэлжилж байна. Уг хуралдаан өглөө 09:00 цагт эхлэх товтой байсан ч Цэцийн гишүүн Ц.Нанзаддорж хуралдаанд оролцохоос татгалзсан тул түр хойшилсон. Ингээд Ц.Нанзаддоржийн оронд Ж.Эрдэнэбулганыг оролцуулан, 15:00 цагт хуралдаж эхэлсэн юм. Энэхүү дунд суудлын хуралдааны эцэст Х.Баттулга Ерөнхийлөгчийн сонгуульд дахин нэр дэвших боломжтой эсэх нь шийдэгдэх юм. Энэ талаар УИХ-ын Ардчилсан намын гишүүд байр сууриа илэрхийлсэн юм.

УИХ-ын гишүүн Ж.Батсуурь: Монгол Улсын одоогийн Ерөнхийлөгчийг нэр дэвшүүлэхгүй гэх шийдэр гаргах гэж байна

Үндсэн хуулийн цэц рүү ирэх бүх уулзварыг цагдаагийн байгууллагынхан хаасан байна. Өмнө Үндсэн хуулийн цэцийн бага суудлын хуралдаан болж байхад бүрэн эрх нь дууссан гэж нэг хүнийг ажлаас нь чөлөөлж байсан юм. Тухайн үед Үндсэн хуулийн цэцийн дарга Н.Чинбатаас тодруулахад “Үндсэн хуулийн бага суудлын хуралдаан хуралдаж байна” гэх мэдээлэл өгч байсан. Гэтэл  Үндсэн хуулийн цэц хуралдаж байхад нэг гишүүнийг чөлөөлж бага суудлын хуралдааныг хойшлуулж дунд суудлын хуралдаан руу шууд оруулж байна. Энэ хуралдааныг Д.Одбаяр даргалж байгаа. Өмнө нь бага суудлын хуралдааны  даргалж байхдаа хурлыг орхиж гарсан. Өнөөдөр мөн  дунд суудлын хуралдааны даргалж байна гэдэг Монгол Улсын Ерөнхийлөгчийн сонгуульд зориулсан шийдвэрийг гаргах гэсэн хэрэг. Үндсэн хуулийн дунд суудлын хуралдаан хараат бус байх ёстой. Гэтэл хөл хорионы үед цагдаагийн байгууллагуудаар хамгаалуулж улстөржсөн шийдвэр гаргах гэж байгаад харамсаж байна. Ардчилсан намын бүлгээс өнгөрсөн долоо хоногт Д.Одбаярыг чөлөөлөх УИХ-ын тогтоол өргөн барьсан. Өнөөдөр тус асуудлыг хэлэлцэх ёстой. Гэтэл Монгол Улсын одоогийн Ерөнхийлөгчийг сонгуульд нэр дэвшүүлэхгүй гэх шийдвэр гаргах гэж байгаа.

УИХ-ын гишүүн Ц.Туваан: Коронавирусийн халдварыг гурав дах удаагийн сонгуульд ашиглаж байна

Коронавирусийн халдварыг хоёр сонгуульд ашигласан. Одоо гурав дахь удаагийн сонгуульд ашиглах гэж байна. Үндсэн хуулийн цэцийн дунд суудлын хуралдаан хууль зөрчиж байна. Мэдээлэл гаргасан иргэн оролцох ёстой. Гэтэл коронавирусийн халдвараар далимдуулж орцыг нь хааж, зам хаасан байна. Тухайн хүний итгэмжлэгдсэн өмгөөлөгч оролцох гэхээр оролцуулахгүйгээр хуралдаан үргэлжилж байна. Тэгэхээр бүтэн тавилттай жүжиг болж байна гэсэн үг. Үүнийг Ардчилсан намын бүлэг УИХ-ын чуулган болон хэвлэл мэдээллийн байгууллагуудаар дамжуулан хэлж байсан. Үндсэн хуулийн цэцийн дээр хөх тэнгэр байдаг гэж бид ярьдаг. Гэтэл үүний дээр эрх баригч Монгол Ардын нам байдаг гэдэг нь тодорхой болж байна.

УИХ-ын гишүүн Н.Ганибал: Үндсэн хуулийн цэц Монгол Ардын намын гар, хөл болсон

Үндсэн хуулийн цэц Монгол Ардын намын гар, хөл болсон. Монгол Ардын намын моорог болсонд харамсаж байна. Асуудлыг хуулийн дагуу шийднэ гэдэгт итгэж хүлээж байгаа.