Шадар сайд С.Амарсайханы эхнэр, МҮОНРТ-ийн нэвтрүүлэгч Ч.Ичинхорлоо коронавируст халдварын "улаан бүс" буюу ХӨСҮТ рүү ороод хоёр цаг болоод буцаж гарч ирсэн асуудал дэгдэж, олон нийтийн шүүмжлэлийг дагуулаад байгаа. 

Эхнэрээ, эхнэрийнхээ ээж, аавыг энгийн иргэдээс дээгүүрт тавьж, ХӨСҮТ рүү дураараа орж гаргах эрхийг Шадар сайд С.Амарсайхан өгсөн үү, ХӨСҮТ-ийнхэн Шадар сайдын гэр бүлийнхэнд жирийн иргэдэд хүртээлгүй "тусгай журам"-аар үйлчилсэн үү, гэдэг асуудал ч дэгдээд буй. Шадар сайд С.Амарсайхан эхнэрийнхээ энэ үйлдлийг тайлбарлахдаа халдвар хамгааллын дэглэм зөрчөөгүй, хууль ёсны дагуу үйлдэл, эхнэр маань 10 хоног аавынхаа гэрт тусгаарлагдаж байгаа. Би 10-аад хоног эхнэртэйгээ уулзаагүй гэж мэдэгдсэн тайлбарласан.

Тухайлбал, тэрбээр "Би хэн нэгнийг зөвтгөх гэж тайлбар хийх гээгүй. Манай эхнэрийн аав, ээж нь халдвар авсан. 80 гарсан асаргаанд байдаг хүмүүс байдаг. Тиймээс халдвар хамгааллын дэглэмээ баримталж, эхнэр маань аав ээжийгээ ХӨСҮТ-д хүргэж өгсөн. Мөн өөрөө вакцин хийлгэж, вакцины урвал илэрсэн учраас ХӨСҮТ-д очсон. Эхнэр хамт явсан учраас дам хавьтал гээд тусгаарлагдсан. Улмаар хоёр, гурав удаа шинжилгээ өгөөд сөрөг гарсан. Одоо тусгаарлалтад байгаа. Манай эхнэрийн хувьд халдвар гарсан голомт буюу аав, ээжийнхээ байгаа газар тусгаарлагдаж байгаа гэдгийг тодотгож хэлье" гэж мэдэгдсэн. Мөн Ч.Ичинхорлоо өөрийн албан ёсны цахим хуудсаараа аавынхаа гэрт тусгаарлагдаж байгаа гэж тайлбарласан.

 Гэтэл аавынхаа гэрт тусгаарлагдаж байгаа гэх Шадар сайд С.Амарсайханы эхнэр Ч.Ичинхорлоо нь өнгөрсөн гуравдугаар сарын 26-нд Налайхад очиж, вакцин хийлгэсэн гэх баримтууд гарч ирээд байгаа. Өөрөөр хэлбэл, тусгаарлалтад байгаа гэх Ч.Ичинхорлоо хэдхэн хоногийн өмнө Налайхад вакцин хийдгээд явж байсан нь үнэн бол гамшгийн тухай хууль болон цар тахлын үед баримталж буй дүрэм, журмуудыг зөрчсөн үйлдэл болох нь.

Тухайлбал, гамшгаас хамгаалах тухай хуулийн 5.13.2-т "Гамшиг, аюулт үзэгдэл, халдварт өвчин, осол, аюулын үед эрх бүхий байгууллагаас тогтоосон хорио цээр, хөдөлгөөний хязгаарлалт, тэдгээрийн дэглэм зөрчсөн, эсхүл саад учруулсан нь эрүүгийн хариуцлага хүлээлгэхээргүй бол хүнийг 500 нэгжтэй тэнцэх хэмжээний төгрөгөөр торгох, эсхүл 7-30 хоногийн хугацаагаар баривчлах шийтгэл оногдуулах, хуулийн этгээдийг таван мянган нэгжтэй тэнцэх хэмжээний төгрөгөөр торгоно" гэх заалт бий. Өөрөөр хэлбэл, Шадар сайд С.Амарсайханы эхнэр Ч.Ичинхорлоо тусгаарлалтад байх хугацаандаа вакцин хийлгэх нэрээр гарч явсан нь тогтоогдвол дээрх хуулийн хариуцлага хүлээх юм.