Гадаад харилцааны сайд Б.Батцэцэг Монгол Улсаас хилийн чанадад суугаа ДТГ-ын тэргүүн нартай ганцаарчилсан цахим уулзалт хийж эхэлжээ. Уг цахим уулзалтын хүрээнд өнгөрсөн бямба гарагт Бүгд Найрамдах Итали Улс, Бүгд Найрамдах Польш Улс, Холбооны Бүгд Найрамдах Герман Улс, Бельгийн Хаант Улсад суугаа Элчин сайд нартай цахим уулзалт хийсэн байна.

      Уулзалтын үеэр Гадаад харилцааны сайд Б.Батцэцэг Элчин сайд нартай шинээр байгуулагдсан Засгийн газраас хэрэгжүүлэх бодлого, үйл ажиллагаа болон цаашид гадаад харилцааны салбарт хийхээр төлөвлөж буй ажил, арга хэмжээнүүдийн талаар танилцуулж, тодорхой асуудлаар үүрэг чиглэл өгөхийн зэрэгцээ  тухайн оронтой хөгжүүлж буй харилцааны талаар санал солилцсон юм.

      Мөн гадаадын улс орнууд “Ковид-19” цар тахлын үеийн хүндрэл бэрхшээлийг даван туулах, ард иргэдээ вакцинжуулах, эдийн засгийг сэргээх, цар тахалтай тэмцэж буй талаарх сайн туршлагыг судалж, нэвтрүүлэх чиглэлээр идэвх, санаачилгатай ажиллаж, тодорхой санал дэвшүүлж, эрч хүчтэй ажиллахыг Элчин сайд нарт үүрэг болгосон байна.

Д.ЦЭДЭВСҮРЭН