Монгол Улсын Ерөнхий сайд Н.Учрал ОХУ-ын Владивосток хотод болж буй Дорнын эдийн засгийн XI чуулга уулзалтын үеэр ОХУ-ын Эрчим хүчний сайд С.Е.Цивилёвтэй өнөөдөр /2026.09.03/ уулзаж, түлш шатахууны нийлүүлэлтийн тогтвортой байдлын асуудлаар санал солилцжээ.

   Уулзалтын үеэр ОХУ-ын Эрчим хүчний сайд С.Е.Цивилёв олон улсын болон бүс нутгийн нөхцөл байдлын нөлөөгөөр дэлхийн түлш, шатахууны зах зээлд тодорхойгүй байдал үүсэж буйг онцолжээ. ОХУ энэ оны дөрөвдүгээр сард нефтийн бүтээгдэхүүний экспортод хязгаарлалт тогтоосон ч Монгол Улсын шатахууны хангамжийг тогтвортой хадгалах, нийлүүлэлтийг тасалдуулахгүй байхад онцгой анхаарч ирснийг тэрбээр тэмдэглэсэн байна. Тэрбээр цаашид Засгийн газар хоорондын хэлэлцээрийн хүрээнд Монгол Улсын нефтийн бүтээгдэхүүний хэрэгцээг найдвартай, тасралтгүй хангах чиглэлээр хамтын ажиллагааг үргэлжлүүлж, нийлүүлэлтийн тогтвортой байдлыг хадгалахад ач холбогдол өгч ажиллахаа илэрхийлжээ.

   Мөн “Роснефть” болон “Газпром НХН”-ийн удирдлагууд Засгийн газрынхаа шийдвэрийн дагуу Монгол Улсад түлш шатахууныг тогтвортой нийлүүлнэ гэдгээ Ерөнхий сайд Н.Учралд илэрхийлжээ.\ Ерөнхий сайд Н.Учрал Монгол Улсын эдийн засаг, эрчим хүчний аюулгүй байдлыг хангахад чухал ач холбогдолтой газрын тосны бүтээгдэхүүний нийлүүлэлтийг хоёр улсын Засгийн газар хоорондын хамтын ажиллагааны хүрээнд тогтвортой хангаж ирсэнд Оросын талд талархал илэрхийлсэн байна.

   Талууд шатахууны хангамжийн тогтвортой байдлыг урт хугацаанд хангах, нийлүүлэлтийн эрсдэлийг бууруулах чиглэлээр хамтын ажиллагааг өргөжүүлэх боломж, цаашдын механизмын талаар санал солилцсон байна. Уулзалтаар “ДЦС-3”-ын өргөтгөл, шинэчлэлийн төслийн зураг төсөл боловсруулах тухай Засгийн газар хоорондын хэлэлцээр хүчин төгөлдөр болсныг талууд тэмдэглэжээ. Төслийн хэрэгжилтийг эрчимжүүлэх зорилгоор “ДЦС-3” ТӨХК болон “Интер РАО Экспорт” компанийн хооронд байгуулах зураг төслийн гэрээний нөхцөл, өртөг, төлбөр тооцооны асуудлыг ойрын хугацаанд эцэслэн тохиролцох нь чухал гэдэгт санал нэгдсэн байна.

   Мөн Монгол Улсын нутаг дэвсгэрээр дамжин өнгөрөх байгалийн хий дамжуулах хоолойн төслийг стратегийн ач холбогдолтой гэж үзэж байгаагаа Ерөнхий сайд Н.Учрал илэрхийлж, төслийн дараагийн шатны гэрээ хэлэлцээг эрчимжүүлэхэд Оросын талын дэмжлэгийг үргэлжлүүлэн авах хүсэлт тавьжээ.

   Түүнчлэн Улаанбаатар хотын агаарын бохирдлыг бууруулах, цэвэр эрчим хүчний эх үүсвэр нэвтрүүлэх асуудлыг судлах хамтарсан ажлын хэсэг байгуулах саналыг ОХУ-ын Эрчим хүчний сайд гаргасан байна.

   Уулзалтын төгсгөлд энэ онд Монгол, Оросын хооронд дипломат харилцаа тогтоосны 105 жилийн ой тохиож байгааг онцлон, хоёр улсын иж бүрэн стратегийн түншлэлийн харилцааг бэхжүүлэх, түлш, эрчим хүчний салбарын хамтын ажиллагааг өргөжүүлэх талаар санал солилцсон аж.