Ардын намын удирдлагууд үнийн өсөлт болон эдийн засгийн нөхцөл байдлын талаар мэдээлэл хийжээ.

    АН-ын нарийн бичгийн дарга Г.Лхагвадорж  “Өнгөрсөн Даваа гарагт бид бүхний эхлүүлсэн “Өөрчилье, бүтээе” үндэсний хөдөлгөөний хүрээнд Ардчилсан намаас бүх сум, дүүргүүд, орон нутаг руу ажиллаж байна. Энэ хүрээнд иргэдийн зүгээс тавьж байгаа хамгийн гол асуулт нь “Үнийн өсөлт” гэдэг зүйлийг ярьж байна. Иргэдийн хувьд төр засаг үнийн өсөлт дээр бодлого гаргаж чадахгүй, хамгаалж чадахгүй байна гэж хамгийн их ярьж байна. Өнгөрсөн жилийн хугацаанд нэг өрхийн орлого 4.8%-иар буурсан. Энэ нь цар тахлын үеэс бараг давсан хэмжээний нөхцөл байдал руу орсон гэсэн үг. Мөн ерөнхий бараа бүтээгдэхүүний үнэ 10-15%-иар өссөн. Сүүлийн арван жилд иргэдийн зээл 428%-иар нэмэгдсэн байна. Харин сүүлийн нэг жилд 17%-иар өссөн байна. Энэ бол иргэдийн орлого нь хүрэхгүй, инфляцаас болоод бүх зүйлээ зээлээр аргалж байна. Дээрээс нь зарлагаа танаж эхэлсэн. Бид өнөөдөр нэгдүгээрт үнийн өсөлтийн тухай, хоёрдугаарт үндэсний хөдөлгөөнтэй холбоотой мэдээлэл өгнө, гуравдугаарт өнгөрсөн хугацаанд Ардын намаас шаардаж байсан хоёр зүйлээ нэмж шаардахыг хүсэж байна. Төсвийн тодотголоо оруулж ирсэн юм бол ажил хэрэгч хандаад, их хурлаа яаралтай хуралдуулаад, чуулганаар энэ асуудлаа хэлэлцмээр байна. Энэ бол улс төржилт биш, иргэдэд тулгамдаад байгаа асуудлыг шийдэж өгөөч ээ гэсэн хүсэлт юм. Бас чуулганаар энэ данхайсан төсвөөсөө 20 сайдаа цөөл гэдэг шаардлагаа дахин тавьж байна” гэлээ.

   АН-ын дэд дарга Н.Ганибал  “Яагаад шатахуун хомсдов, яагаад үнэ өсөв. Энэ бол засгийн газрын алдаатай буруу бодлого. Засгийн газар 45 хоногийн нөөцөө хэрхэн яаж зөв зохицуулж, зарцуулах вэ гэдэг талаар бодлого, тооцоо гаргах ёстой салбарын сайд нь буруу бодлого гаргаснаас болж өнөөдрийн нөхцөл байдал руу биднийг оруулсан. Аж үйлдвэр, эрдэс баялгийн сайд Дамдинням гэж нөхөр наадмын амралтаар иргэдийгээ “Яв, амар, хотоо чөлөөл. Бензин бол хангалттай байгаа” гэж алиа хошин мэдээлэл хийсэн. Өнөөдөр бид нэг бол их рийл хийсэн, эсхүл алиа хошин шийдвэр гаргасан дарга нартай л боллоо. Хичээлийн шинэ жил дөхөж байхад харамсалтай нь эцэг эхчүүд маань хүүхдүүдийнхээ хичээлийн хэрэглэлийг авахад хүндрэл учраад байна. Нэг хүүхдийн хичээлийн хэрэглэлийг авахад л багадаа 500,000 төгрөг болж байгаа. Хоёроос гурван хүүхэдтэй айл бол 1.5 сая төгрөг болж байна. Энэ их мөнгийг иргэд маань хэрэглээний зээл аваад, ашиглаж, хэрэглэж байгаа. Уг нь Монгол улс боловсрол, эрүүл мэнд хоёр нь үнэгүй гэх ч хүүхдээ сургуульд явуулах асуудал нь маш хүнд болчихлоо. Иймээс Ардчилсан намын бүлгийн гишүүд маань Н.Учралын засгийн газрыг огцруулъя гэж байгаа юм. Яагаад гэвэл өнөөдрийн гаргаж байгаа нэг сайдын алдаа Монгол улсын зовлон болж байна. Тэвчиж болох зардлуудаа засгийн газар төсвийн тодотголоороо барьж орж ирсэнгүй. Манай дарга нар ард түмэндээ үнэнээ хэлдэг баймаар байна” гэлээ.