Манай улсад НҮБ-ын Хүний эрхийн дээд комиссар Фолькер Түрк албан ёсны айлчлал хийж байна. НҮБ-ын Хүний эрхийн дээд комиссар 26 жилийн дараа Монгол Улсад ийнхүү айлчилж буй нь манай улс хүний эрх, ардчилал, эрх зүйт ёсыг тууштай бэхжүүлж ирсний илэрхийлэл юм.

    Айлчлалын хүрээнд дэлхий нийтийн сорилтууд хүний эрхэд хэрхэн нөлөөлж буй талаар санал солилцож, Монгол Улс НҮБ болон олон улсын түншүүдтэй хамтын ажиллагаагаа үргэлжлүүлэн бэхжүүлэх байр сууриа илэрхийллээ. Мөн хүний эрхийн олон улсын гэрээ, конвенцын хэрэгжилт, тайлагналын тогтолцоогоо тогтмол сайжруулж, НҮБ-ын “Тогтвортой хөгжлийн хамтын ажиллагааны хүрээ”-г үндэсний бодлоготой уялдуулан хэрэгжүүлж байгааг онцоллоо.

   Түүнчлэн Гадаад харилцааны яам болон НҮБ-ын Хүний эрхийн дээд комиссарын алба хооронд Ази, Номхон далайн бүсийн хүний эрхийн судалгааны төв байгуулах санамж бичиг байгуулсан нь “Хүний эрхийн түгээмэл тунхаглал”-ын 75 жилийн ойд өгсөн амлалтыг хэрэгжүүлэх чухал алхам болов. Уг төв нь бүс нутгийн хэмжээнд судалгаа, сургалт, туршлага солилцоог дэмжихэд чиглэнэ.

    Мөн уур амьсгалын өөрчлөлт, цөлжилт болон хүний эрхийн уялдаа холбооны хүрээнд Улаанбаатар хотноо зохион байгуулагдах Цөлжилттэй тэмцэх тухай НҮБ-ын конвенц-ын Талуудын 17 дугаар бага хурлын үеэр эмзэг бүлгийн, тэр дундаа хүүхэд, эмэгтэйчүүдийн эрхийг хамгаалах чиглэлээр хамтарсан арга хэмжээ зохион байгуулахаар тохиролцов.

    Мөн дээд комиссар “Global Alliance for Human Rights” санаачилгаа танилцуулж, хүний эрхийг дэлхий нийтийн бодлого, шийдвэр гаргалтын төвд байршуулахын ач холбогдлыг онцоллоо. Монгол Улс хүний эрхийг гадаад бодлогынхоо салшгүй хэсэг гэж үздэгийн хувьд энэхүү санаачилгыг нухацтай судалж, хамтын ажиллагааны боломжийг эрэлхийлж байна. Энэхүү айлчлал нь Монгол Улс болон НҮБ-ын хамтын ажиллагаа, хүний эрхийн чиглэл дэх түншлэлийг гүнзгийрүүлэх чухал боломж болж байна.