Франц Улсын Парис дахь “ЮНЕСКО”-ийн төв байранд  хүн төрөлхтний соёлын биет бус өвийн төлөөллийн жагсаалтад бүртгэгдсэн “Наурызын баяр” өвийг сурталчлах соёлын арга хэмжээ болов.  Тус ёслолыг  хамтран бүртгүүлсэн улс орнуудын “ЮНЕСКО”-гийн дэргэд суугаа Байнгын төлөөлөгчдийн газраас 2026 оны дөрөвдүгаар сарын 7-ны өдөр зохион байгууллаа.

    Энэхүү өвийг Казахстан, Киргиз, Монгол, Афганистан, Азербайжан, Иран, Ирак, Пакистан, Тажикстан, Турк, Туркменистан, Узбекистан, Энэтхэг зэрэг улс хамтран бүртгүүлсэн юм. Манай улс 2024 оны арванхоёрдугаар сард болсон Соёлын биет бус өвийг хамгаалах тухай 2003 оны конвенцын Засгийн газар хоорондын хорооны 19 дүгээр чуулганы хуралдаанаар энэхүү өвд нэгдсэн билээ.

    Бусад хамтран бүртгүүлсэн улсуудын хамт энэхүү өвийг сурталчлах үйл ажиллагаанд манай улс оролцохдоо казах зон олноо төлөөлөн үндэсний зоог, идээ ундаагаа сурталчлан орон орны төлөөлөлд мэндчилгээ дэвшүүлэв.  Уг арга хэмжээнд “ЮНЕСКО”-гийн удирдах албан тушаалтнууд болон “ЮНЕСКО”-гийн гишүүн орнуудын Элчин сайд, Байнгын төлөөлөгчид, иргэний нийгмийн төлөөлөл оролцов.

   Наурыз буюу Хаврын баярыг 3000 гаруй жилийн туршид өргөн дэлгэр тэмдэглэж буй бөгөөд энх тайван, эв нэгдлийн үнэт зүйлсийг түгээн дэлгэрүүлдэг учраас “ЮНЕСКО”-гийн үнэт зүйлстэй нийцдэг байна.