Өнөөдөр амьдрал шинээр эхэлж, байгаль дэлхий дахин амилан сэрж буйг бэлгэдсэн, хүн төрөлхтний үнэт өв болсон наурызын баярын өдөр. Наурыз бол зүгээр нэг баяр бус дэлхийн олон орны 300 гаруй сая хүний тэмдэглэдэг, шинэ эхлэл, эв нэгдэл, байгаль дэлхийтэйгээ хүйн холбоотой орших соёлын гүн утга учрыг илэрхийлсэн онцгой өв уламжлал юм.

    Наурызын уламжлал нь хүмүүсийг ойртуулж, хүндэтгэл, эв нэгдэл, өгөөмөр сэтгэлийг эрхэмлэдэгт оршдог. Энэ өдөр хүн бүр сэтгэлээ ариусган, шинэ бүхнийг угтан, сайн сайхныг бэлгэддэг нь уг баярын мөн чанар, утга агуулга билээ.  “Хаврын баяр–2026” арга хэмжээ нь зөвхөн баяр наадам бус, харин өв соёлоо түгээн дэлгэрүүлэх, олон улсад сурталчлах, аялал жуулчлалын шинэ боломжийг нээх чухал ач холбогдолтой.

   Монгол Улсын төр засаг казах түмний үнэт өв, соёл уламжлалыг ямагт дээдлэн хүндэтгэж ирсэн төдийгүй цаашид ч энэ эрхэм хандлагаа улам бататган хадгалах болно. Соёл, спорт, аялал жуулчлал, залуучуудын яамны зүгээс наурызын баярын соёлын өвийг хамгаалах, өвлүүлэн үлдээх, түгээн дэлгэрүүлэхэд бодлого явуулж байгаа. Тус баярын үйл ажиллагааг өндөр түвшинд тууштай дэмжлэг үзүүлж, энэхүү хаврын уламжлалт баярыг уламжлал, орчин үеийн хөгжлийг хослуулсан баяр болгосон.

   Наурызын баярыг аялал жуулчлалтай уялдуулан хөгжүүлсэн нь гадаад, дотоодын жуулчдын сонирхлыг татах болсон билээ. Цаашид Монгол Улсын соёлын онцлогийг дэлхийд таниулсан брэнд арга хэмжээ болгохыг зорин ажиллаж байна.