Монгол Улсад "Жендэрт суурилсан хүчирхийлэлтэй тэмцэх тогтолцоог бэхжүүлэх нь (2025–2030)" хоёрдугаар шатны төсөл Канад Улсын албан ёсны санхүүгийн тусламжаар 2025 оны зургаадугаар сараас хэрэгжиж эхэлсэн.

  Төслийн удирдах хорооны анхны хурлыг 2025 оны 10 дугаар сарын 17-ны өдөр зохион байгуулахаар төлөвлөж байгаатай холбогдуулан өнөөдөр Хууль зүй, дотоод хэргийн яамны Төрийн нарийн бичгийн дарга Н.Мягмар Канад Улсын Гадаад хэргийн яамны Монгол ба Номхон далайн орнуудын Хөгжлийн хөтөлбөрийн ахлах мэргэжилтэн Марун Абу Файссалыг хүлээн авч уулзлаа.

  Төрийн нарийн бичгийн дарга Н.Мягмар уулзалтын үеэр Канадын санхүүгийн дэмжлэгтэйгээр хэрэгжсэн төслийн эхний шат (2019–2023) амжилттай хэрэгжиж, гэр бүлийн хүчирхийлэлтэй тэмцэх, урьдчилан сэргийлэх, хохирогчийг хамгаалах тогтолцоог сайжруулахад бодит үр дүн гарсныг онцоллоо. Мөн төслийн хоёрдугаар шат нь энэхүү үр дүн, мэдлэг, туршлагад тулгуурлан бодлогын залгамж чанарыг хангаж, төслийн тогтвортой байдлыг бэхжүүлэх өндөр ач холбогдолтой болохыг тэмдэглэв.

  Марун Абу Файсалын хувьд энэ удаагийн төсөл нь хууль сахиулах болон шүүхийн байгууллагууд руу чиглэж буйгаараа онцлогтой болохыг дурдсан бөгөөд жендэрт суурилсан хүчирхийлэлтэй тэмцэх үйл ажиллагаанд бүх талын оролцоо, уялдаа холбоо чухал болохыг онцоллоо. Талууд төслийн удирдах хорооны анхны хурлын бэлтгэл ажлын талаар санал солилцож, цаашдын хамтын ажиллагааг үр дүнтэй үргэлжлүүлэхэд санал нэгдсэн үр дүнтэй уулзалт боллоо.