Үндсэн хуулийн цэцийн их суудлын хуралдаан түр завсарлаж, гишүүд байр сууриа илэрхийллээ. Энэ үеэр  УИх-ын гишүүн Ц.Сандаг-Очир “УИХ-ын гишүүн П.Сайнзориг гишүүн Ерөнхий сайдыг огцруулах саналыг анх өргөн барьсан. Үндсэн хуулийн цэцийн их суудлын хуралдааны үеэр УИХ-ын гишүүн, УИХ-ын даргын итгэмжлэгдсэн төлөөлөгч гэх эрхээ эдэлж чадахгүйд хүрлээ. Цэцийн хуралд үг хэлэх боломжгүй байгаа нь туйлын харамсалтай байна. Цэцийн хуралдаан хэт нэг талыг барьж асуудалд хандаж байна. Итгэмжлэгдсэн төлөөлөгчдийн зүгээс хэд хэдэн асуудалд санал, гомдол гаргасан. Тухайлбал, цэц маргаан хянан шийдвэрлэх хуулиараа гуравхан тохиолдол цэцийн их суудлын хуралдааныг хуралдуулах хуулийн заалт байдаг. Гэтэл үүнийг цэцийн гишүүд мушгин тайлбарлаж байна.  Монгол Улсад онц байдал, дайн, цэрэг, зэвсгийн асуудлыг цэцийн их суудлын хуралдаанаар  хэлэлцэнэ гэсэн хуулийн зохицуулалт байхад Ерөнхий сайдыг огцруулах санал хураалт явуулсан нь зөв эсэх асуудлыг шууд их суудлын хуралдаанаа хуралдуулж байгаа нь буруу. Цэцийн тухай хуулиа зөрчиж, дунд суудлын хуралдааны процессийг алгасаж байна. Х.Булгантуяа даргын хувьд өмгөөлөгч авах эрхтэй, өмгөөлөлийн тухай хуулийн олон зүйл заалт зөрчигдөж байна гэхэд түүний боломжийг хангасангүй. УИХ-ын зүгээс тавьсан санал гомдлыг цэцийн хуралдаан даргалагч өөрийн байр сууриар хандаж байгаа нь буруу. Цэцийн хуралдааны хариу нэг талыг барьсан байдлаар гарах нь тодорхой болчихсон юм байна гэж хардахаар байна” гэлээ.