МАН-ын Бага хурал өнөөдөр болно. Хуралд ирсэн УИХ-ын гишүүдийн байр суурийг сэтгүүлчид тодрууллаа. Энэ үеэр УИХ-ын гишүүн А.Ариунзаяа “Хурал минь зарлагдахгүй яасан ч удав даа. Намын даргын асуудлыг энэ хурлаар шийдэх байх. Нэгдүгээрт, зохион байгуулалтын асуудал байгаа. Хоёр агуулгаар зохион байгуулалт хийнэ гэж ойлгож байгаа. Нэгдүгээрт, квотоор орох ёстой албан тушаалтнууд намын бага хуралд орох, Төрийн албаны хуулиар болон өөрийн хүсэлтээр Хяналтын Ерөнхий хорооны шийдвэрээр бага хурлын гишүүдийн жагсаалтаас гарч байгаа хүмүүсийг хасах. Хоёрдугаарт, намын даргынхаа асуудлыг ярилцаж, шийднэ дээ. Энэ ондоо багтаж Их хурлаа заавал хийх ёстой. Улс төрийн намын тухай хуульд нийцүүлж дүрэм, журам зохион байгуулалтын асуудлаа нийцүүлэх ёстой. МАН-ын 300 мянга гаруй гишүүдийн хувьд эв нэгдэлтэй байдаг. Шийдвэр гаргах түвшний цөөн хүмүүс хагаралтай байгаа нь хэнд ч ойлгомжтой байна. Сонгуульд ялсан намынхаа даргыг Ерөнхий сайдад дэвшүүлдэг. УИХ-ын дарга Д.Амарбаясгалан намын даргад нэр дэвшинэ гэдгээ илэрхийлсэн. Түүнээс хойш асуудал хөвөрлөө. Нэгнийгээ барьж, хорьж байгаа асуудал, хэвлэлээр харлуулж, гүтгэж байгаа зэрэг нь хэрээс хэтэрлээ. Намаа гутааж байгаа хүмүүст харамсаж байгаа. Уг нь, Ерөнхийлөгчийн сонгууль шиг бүх нийтээрээ нэг хүнийг сонгох гээд байгаа асуудал биш” гэлээ.