УИХ-ын дарга Д.Амарбаясгалан цаг үеийн асуудлаар сэтгүүлчидтэй нээлттэй ярилцлага хийж байна. Энэ үеэр “Намын даргад нэр дэвшихдээ хувь хүн биш хууль засагладаг улс орон болох хэрэгтэй гэж мэдэгдсэн. Тэгвэл хэн засаглаад байгааг нэрлэж болох уу. Үндсэн хуульд өөрчлөлт оруулах замаар одоогийн төрийн тэргүүний хугацааг сунгах асуудал яригдаж байсан гэсэн. Одоо ч энэ талаар ярьж байна. Та энэ талаар мэдээлэл өгч болох уу” гэсэн асуултад хариуллаа.

                Тэрбээр “Одоогоор Үндсэн хуульд өөрчлөлт оруулах, ард нийтээс санал  асуулга явуулах гэдэг дээр яригдаж байгаа зүйл байхгүй. Ерөнхийлөгчийн түвшинд ч, УИХ-ын түвшинд ч байхгүй, Засгийн газрын түвшинд ч тийм зүйл байхгүй гэж бодож байна. Засгийн газрын дотор юу болж байгааг би мэдэхгүй. Ерөнхийлөгчийн түвшинд бол байхгүй. Учир нь, хавар зургадугаар сараас хойш бид хэд хэдэн удаа уулзаж, ярилцсан. Тэр үед ийм асуудлаар огт ярилцаагүй. Хувь хүн засагладаггүй, хууль засагладаг төртэй болох гэдгийг 2020 оноос эхлээд олон түвшинд ярьсан. Хувь хүн засаглах гээд байна уу гэдгийн жишээг би сая дурдсан. Өчигдөр орой АТГ дээр өрсөлдөгчийг нь дэмжих гэж байгаа Бага хурлын гишүүдийн нэрийг байцаагч тус бүрт өгч түүхийг нь судлах гэж үзсэн явдал байлаа. Хуулийн хяналтын байгууллага улс төрийн намын даргын сонгуулийн үйл ажиллагаа руу ингэж дайрч дарамталж байгаа асуудал нь хэрээс хэтэрсэн. Би бямба гарагт Бага хурал дээр очиход намайг дэмждэг хүмүүс ирээгүй байвал АТГ-ын дарамтад ороод ирээгүй байна гэсэн дүгнэлт хийнэ. Хэн хэн, ямар асуудлаар дарамтлуулсныг  нь зарлана. Ерөнхий сайдыг сонгоход Бага хурлын гишүүдэд олон төрлийн хөндлөнгийн дарамт үзүүлсэн. Гишүүдийг зурсан, дугуйлснаа харуулахыг шаардаж, дарамталж байж санал хураалт болсон. Миний ард намын дэмжигчид байна. Нөхрүүдийн гарт хууль хяналт, шорон цагдаа байна. Гэхдээ би гишүүдийнхээ эрхийг хангаж, хамгаалахын төлөө айдас, дарамтад автахгүйгээр өрсөлдөнө” гэв.