АН-ын даргаар УИХ-ын гишүүн О.Цогтгэрэл сонгогдлоо. Тэрбээр өөрийн байр сууриа илэрхийлэхдээ “Ардчилсан намын даргын сонгуульд 63 хувийн саналаар сонгогдлоо. Итгэл хүлээлгэсэн ардчилсан намынхандаа, АН-ын гишүүддээ баярлалаа. Ардчилсан намын үндсэн дүрмийн дагуу Үндэсний бодлогын хорооноос сонгогдоод Ардчилсан намын Их хурлаар ёсчилон батлагдах ёстой. Ардчилсан нам улс төрийн зорилго, амбицтай байх ёстой. 2028, 2032 оны УИХ-ын сонгуульд дараалан ялах зорилгоо хамтаараа тавих ёстой. Мөн Ерөнхийлөгчийн сонгууль, орон нутгийн сонгуульд давхар ялах ёстой. Ингэж байж Монгол Улс ардчилсан тогтолцоо гэдэг хувийн өмчийг, жижиг төрийг дээдэлсэн тогтолцоо сонгуулиас сонгуулийн хооронд бэхжих ёстой. Ийм зорилгыг өөртөө болон бусад намынхандаа уриалж байгаа. Нам бол дарга биш. Нам бол олон нийтийн байгууллага, төлөөллийн байгууллага учир хувь хүний үзлээр төрийн ажлыг хийх ёсгүй. Сүүлийн найман жилийн хугацаанд Монгол Улсын төсөв зургаа дахин нэмэгдсэн. Монгол Улс төржсөн, төсөвжсөн, төвлөрсөн улс болчихоод байгаа. Энэ гурвыг задлах хэрэгтэй. Ардчилсан нам асар олон баатартай. Ардчилсан намд стратегийн жанжид хэрэгтэй. Ардчилсан нам бие даасан шийдвэрээ гаргах эрхтэй болчихвол дотоод эрчим хүч, дотоод энерги ихтэй нам. Ардчилал бэхжих ёстой. Ардчилсан намын ялалт Монголын ардчлалын ялалт байх ёстой. Монголын ардчлалын ялалт Монгол Улсын ялалт байх ёстой гэж боддог. Үүний тулд би чадах бүхнээ хийнэ” гэлээ.