Үүсээд буй нөхцөл байдалтай холбоотойгоор Ардчилсан намын дарга Л.Гантөмөр мэдээлэл өглөө.

Тэрбээр “Монголчууд ядуу хэвээрээ үлдэх, орон сууцжуулах хөтөлбөр хэрэгжихгүй, утаа хэвээрээ үлдэхэд үүний хариуцлагыг хэн хүлээх юм бэ гэдэг асуудал үлдэнэ. Тиймээс МАН өнөөдрийн хурлаараа монголчуудын эрх ашгийг бодож байна уу, үгүй юу гэдгээ эргэн харж, дүгнэлтээ гаргах байх. Миний сонсож байгаагаар АН бэхжих юм байна, АН хамтарсан Засгийн газрын гишүүн хэрнээ, гишүүд нь үгээ хэлж байна гэж ярьж байна. Ардчилсан нам өөрөө ийм олон  үзэлтэй нам. Өөрийнх нь засаг байсан ч манай намын гишүүд шүүмжилдэг. Манай намын гишүүд өөрийнхөө Ерөнхий сайдыг шүүмжилдэг хүмүүс. Энэ нам өнөөдөр ч өөрийнхөө өнгө төрхөөр байгаа. МАН-ын нөхөд маань ойлгож, хүлээж авч сурах хэрэгтэй. Түүнээс биш хамтарлаа гэдэг нь гишүүдийнхээ амыг барь гэсэн үг огт биш. Ийм хэлэлцээрийг бид хийгээгүй. Бид улсын эрх ашгийг бодож ажиллаж байгаа. Бид улсын эрх ашиг нэгт байна гэдэг итгэл үнэмшлээрээ хамтарсан. Улсынхаа эрх ашгаас урвасан тохиолдолд хамтарсан засаг тарах хэрэгтэй. Улсынхаа эрх ашгийг орхиод намынхаа эрх ашиг, нэр хүнд, тодорхой хүмүүсийн төлөө шийдвэр гаргаж байгаа бол цааш явна. Ардчилсан нам засагт байлгаад өгөөч гэж хэзээ ч гуйхгүй, улсынхаа эрх ашгаас хэзээ ч урвахгүй. Бид тавьсан зорилтынхоо талаа Засгийн газрын 2024-2028 оны мөрийн хөтөлбөрийг хэрэгжүүлэхийн төлөө тууштай ажиллаж байгаа. АН-ын улс төрийн зөвлөл хэзээ ч хамтарсан засгийн үйл хэрэгт садаа болох шийдвэр гаргаж байгаагүй. Бид байгуулсан гэрээнийхээ талд хатуу байр суурьтай байгаа. Бизнес эрхэлж байгаа хүмүүс нь амар тайван, илүү татварын дарамт, хүнд сурталгүй байх эрх зүй орчныг 2026 онд хийхийн тулд өнөөдөр бид Нийтийн албаны нотлогдолгүй орлогыг хураах хуулийг УИХ-д өргөн барьж байна. Нийтийн алба хаагч, улс төрчид элдэв авлига, дарамтаар хөнгөждөг байдлыг таслан зогсооно. Гэхдээ хууль орлого нь нотлогдоогүй тодорхой албан тушаалтуудад үйлчилнэ. Бага дунд орлоготой хүмүүсийнхээ татварын бууруулж өгнө. Монголын асуудал, хөгжлийн асуудал шийдэгдэхгүй удсан учраас гурван сая хүний амьдрал  өөдлөхгүй байгаа болохоор бид хамтарсан засаг байгуулсан. Бидний хамгийн олон жил маргаж байгаа бол хил холболт. Үүнийгээ шийдсэн. Эрчим хүчний асуудал, энэ мөнгийг бид босгосон. Мөн газрын тос, бензинтэй болъё гэж олон жил мөрөөдсөн. Үүний хөрөнгийг эцэслэн шийдэж өгсөн. Монгол улсыг утаагүй болгох нүүрс химийн үйлдвэрийн эхлэл тавьж чадсан. Ураны асуудлаа шийдэж чадсан. Энэ бол Монголын түүхэнд үлдэнэ. Нэг үгээр хэлбэл Монгол Улс хөгжиж дэвжих тэр суурийг тавьж чадсан. Харамсалтай нь өнөөдөр цэг тавигдах юм бол эрчим хүчний хангалтаа зузаатгах, үүнээс холбоотой үйлдвэрүүдээ хийх ажил тасалдах аюул ойрхон байна. Үүнд харамсаж байна, нөгөө талаар 10, 20 жил шийдэж чадаагүй асуудлыг арван сарын дотор хийж чадсаныг минь Монголын түүх дүгнэнэ. Хамтарсан засгийн газар тарах юм бол засгийн хямрал дахин ирнэ. Би Ардчилсан намаас нэг л зүйлийг хүснэ. Улс орны эрх ашгийг нэгт тавьдаг сэтгэлгээгээ хадгалж явахыг хичээгээрэй. Эв эе гэдэг бол Монгол төрийн том ухаан. Цахим сүлжээ хөгжсөн энэ цаг үед зодоон бол Монголын хуваана. Сөрөг хүчин болсон тохиолдол шүүмжлэлтэй хандах хандлага нь нэмэгдэнэ. Миний хувьд улс орны эрх ашгийг дарсан улс төр битгий хийгээсэй гэж хүсэж байна. Засгийн газрыг унгахын төлөөх сэдэв бүр хүнд хүрч байна. Би жагсаалын талаар яриагүй, би сэдвийн тухай ярьж байна.