Засгийн газраас гаргасан шийдвэрийг танилцуулж байна. Энэ үеэр Сангийн сайд Б.Жавхлан мэдээлэл өглөө.

Тэрбээр “Өнгөрсөн долоо хоногт манай гол түүхий эдүүдийн экспортын хэмжээ бүгд тодорхой хэмжээнд нэмэгдсэн. Зарим үзүүлэлтийн хувьд өнгөрсөн оны мөн хэмжээнд дөхөж ирсэн долоо хоног байлаа. Долоо хоног бүрийн экспортын хэмжээг харвал өнгөрсөн долоо хоногт экспорт 278 сая ам.долларт хүрч энэ оны хамгийн өндөр тоондоо хүрлээ. Өнгөрсөн долоо хоногоос даруй 40 гаруй сая ам.доллароор нэмэгдсэн үзүүлэлт байлаа. Ингэж үзүүлэлт эерэг гарахад Нарийнсухайтын бүлэг ордуудаас хийгдсэн экспортын дүнгүүд болон хувийн уурхайнуудаас хийгдсэн экспортын дүн нөлөөллөө. Ингээд нүүрсний экспорт өнгөрсөн долоо хоногтой харьцуулахад 1.9 сая тонноор арилжаа нэмэгдсэн. Мөнгөн дүнгээр 40 гаруй сая ам.доллароор өслөө. Эдгээр нааштай үзүүлэлтүүд Төвбанкны валютын нөөц нэмэгдэхэд эерэг нөлөө үзүүллээ. Он гарснаас хойш Монгол Улсын валютын нөөц таван тэрбум 246 сая ам.доллар болсон нь сүүлийн хоёр сар хүрээгүй дүнд хүрлээ гэсэн үг. Экспортыг дэмжих ажлын хэсэг ажилдаа орсон даруйдаа буюу сарын өмнө валютын нөөц чухал тогтвортой эрсдэлгүй түвшинд очих нь чухал гэх бодлогоо тодорхойлсон. Тиймээс валютын нөөцөө хамгаалах нэн тэргүүний зорилтоо хамгаалж яваа гэсэн үг юм. Мөн Засгийн газрын хуралдаанаар экспорттой холбоотой удаах тогтоол гарлаа. Энэ тогтоол дээр гол хоёр чиглэлд яаралтай арга хэмжээ авахаар боллоо. Нэгт, Гашуусухайт, Шивээхүрэн, Ханги, Булган Бичигт эдгээр боомт дээр валютын нөөцөд эерэг үр дүн үзүүлэх, яаралтай гарах шаардлагатай экспортын биет түүхий эдүүд болон боомтуудыг зөв эрэмбэлж хугацаа алдахгүй гаргах зохион байгуулалт хийхийг боомт дээр ажиллаж байгаа төрийн захиргааны байгууллагуудад чиглэл өглөө. Мөн хувийн болон Эрдэнэс Тавантолгойн жижиг Тавантолгой гарч буй экспортуудын биет хэмжээг нэмэгдүүлэх, өрсөлдүүлэх зорилгоор өртгийг нь бууруулах, ялангуяа төмөр зам дээр гартал, төмөр зам дээр гарснаас хойших өртгүүдийг маш бодитойгоор тодорхой хэмжээнд буулгах ийм арга хэмжээ авахыг нүүрсний болон тээврийн компаниудад тодорхой чиглэл болгон өглөө.