УИХ-ын гишүүн асан Ж.Батзандан гэнэтхэн л улс төрийн дуулианаас, төв талбайн жагсаалаас ор мөргүй алга болсныг гайхах хүн олон бий. Уг нь өнгөрсөн он жилүүдэд түүнд мэдэхгүй сэдэв, оролцохгүй жагсаал гэж үгүй байв. Сүүлийн өдрүүдэд ард түмэн цар тахлын дэглэмийг үл хайхран анх удаа жагссан, "Мэргэжлийн Засгийн газар" танхимаараа огцорсон, Оюутолгойн гэрээний асуудал сэдэрсэн, У.Хүрэлсүх Х.Баттулга хоёр "муудалцсан", сөрөг хүчин идэвхижсэн, хэдэн жил "хэвтээ" байсан "босоо" С.Ганбаатар өлсгөлөн зарлаж эхэлсэн дуулиан, шуугианууд үргэлжилж байна. Улс төр, нийгмийн амьдрал ийн буцалж, хэлтэй бүхэн үгээ хэлж, хөлтэй бүхэн жагсаж байхад УИХ-ын гишүүн асан Ж.Батзандан л ганцаараа шахам чимээгүй байгаа. Учир мэдэх зарим нь түүнийг  Австрали Улсад суух Элчин сайдын зөвлөхийн суудлаар амаа "үдүүлсэн" хэмээн хардаж буй. Тэгвэл түүнийг "Түр хүлээ, ганц хором" буландаа урьж, яагаад чимээгүй болсныг нь тодрууллаа. 

-Сайн байна уу, та. Засгийн газар огцорлоо, Оюутолгойн асуудал яригдаж эхэллээ. Иргэд ер нь л ууртай байна. Харин та яагаад чимээгүй байна. 

-Тавлаг, сайхан байна. Ялагдсан гишүүн би түр хугацаанд амарсан нь дээр байлгүй дээ. Ялсан гишүүд нь ажлаа хийг. Гэхдээ асуусанд баярлалаа.

- Таныг Австрали Улсад суух Элчин сайдын зөвлөхөөр томилогдсон мэдээлэл байгаа. Энэ ажлаа хүлээж авсан юм уу?

- Ах нь одоогоор Монголдоо л байна.