УИХ-ын гишүүн Н.Номтойбаяр өнгөрсөн долоо хоногт 360 градус ярилцлагын нэвтрүүлэгт оролцох үеэрээ цагдаагийн хурандаа Ц.Батсүх өөрөөс нь нэг сая ам.доллар нэхсэн гэх асуудлыг дахин хөндсөн. Уг асуудлыг "Цензургүй яриа" нэвтрүүлэгт оролцох үеэрээ анх ярьж байсан юм.

Харин тухайн үед хурандаа Ц.Батсүх "Энэ бол гүтгэлэг. Увайгүй, ичгүүр сонжуургүй гүтгэлэг. Хувь хүний өс хонзонгийн хийгээд улс төрийн өс авах гэсэн л гүтгэлэг яваад байгаа юм. Өөрийнх нь яриагаар бол тэр мөнгө төгрөг нэхсэн гээд байгаа нь 2013 оных юм шиг байгаа юм. Тэр үед би Улсын мөрдөн байцаах газрын даргаар ажиллаж байлаа. Харин Н.Номтойбаяр яасан гэхээр Мунзуйтайгаа нийлээд бааранд зодоон цохион хийж, хутга шөвөгний хэрэгт холбогдсон байсан үе нь. Тэр хэрэг дүүргийн мөрдөнд шалгагдаж байсан. Та бүхэн санаж байгаа бол Н.Номтойбаяр тэр үед сонин хэвлэлээр өөрийгөө буруу зөрүү шалгалаа гээд ярьдаг байсан" хэмээн ярилцлага өгч байв. Харин уг асуудал дахин сөхөгдөж эхэллээ. Тэгвэл УИХ-ын гишүүн Н.Номтойбаяраас нэг сая ам.доллар нэхсэн гэх хурандаа Ц.Батсүх гэж хэн болох талаар товч танилцуулъя.

 Ц.Батсүх нь 1993 оноос Баянгол дүүргийн цагдаагийн хэлтэст мөрдөн байцаагчаар ажиллаж эхэлсэн. Тэрбээр ЦЕГ-ын Зохион байгуулалттай гэмт хэрэгтэй тэмцэх газрын даргаар ажиллаж байгаад Хууль зүйн сайд Х.Тэмүүжинд гүйцэтгэх ажиллагаа явуулсан гэх асуудлаар албан тушаалаасаа чөлөөлөгдсөн. Гэвч Д.Дорлигжав Хууль зүйн сайд 2015 оны нэгдүгээр сарын сүүлчээр Зохион байгуулалттай гэмт хэрэгтэй тэмцэх газрын дарга, хурандаа Б.Буянтөрийг чөлөөлж, Ц.Батсүхийг эргүүлэн томилсон. Улмаар 2015 оны тавдугаар сарын 3-нд Хууль зүйн сайд Д.Дорлигжавын тушаалаар ЦЕГ-ын тэргүүн дэд дарга Ж.Ганбаатарыг чөлөөлж, оронд нь Зохион байгуулалттай гэмт хэрэгтэй тэмцэх газрын даргаар ажиллаж байсан хурандаа Ц.Батсүхийг томилсон байдаг. Түүнийг Ерөнхийлөгч асан Ц.Элбэгдоржийн ойрын хүн гэх нь бий