Өнгөрсөн нэгдүгээр сард Баянзүрх дүүрэгт газ ачиж явсан машин дэлбэрсэн ноцтой осол гарсан. Иргэд одоог хүртэл түрээсийн байранд амьдарч байгаа бөгөөд НИТХ-ын ээлжит хуралдаанаар дээрх асуудлыг хөндсөн юм.

Тус асуудлаар Нийслэлийн засаг дарга бөгөөд Улаанбаатар хотын захирагч Х.Нямбаатар:

 Тэрбээр, “Нийслэлийн Баянзүрх дүүргийн нутаг дэвсгэрт өнгөрсөн өвөл гарсан дэлбэрэлтийн улмаас 207 дугаар байрны суурь бүтэц гэмтсэн. Энэ чиглэлээр нийслэлийн хөрөнгө оруулалтын газар ШУТИС-ийн барилгын үндэсний хийцлэлийг судалдаг мэргэжилтнүүдтэй хамтарч ажилласан. Шинжилгээний дүн гурван удаа гарсан. Нэмэлт шинжилгээний сүүлийн дүнгээр барилын үндсэн хийцлэлд өөрчлөлт орсон. Дэлбэрэлтийн улмаас суурь баганын бүтцүүд цуурч, урвал явагдаж, хүчил төрөгч нэвчсэний улмаас зэврэлт үүсээд эхэлсэн гэсэн дүгнэлт гарсан. Энэ нь тодорхой цаг хугацааны дараагаар шууд нурна гэсэн дүгнэлт гарсан байна.

Тиймээс энэ барилгыг нурааж, гэм буруутай иргэн, хуулийн этгээдээр зардлыг нь гаргуулж  иргэд, оршин суугчдыг хохиролгүй болгох сонголт тулгараад байна. 207 дугаар байр нь анхны зураглалаар 66 үл хөдлөхийн гэрчилгээтэй объект байхаар төлөвлөгдсөн байсан ч 67 иргэн үл хөдлөх хөрөнгийг эзэмшиж байгаа юм байна. Миний ойлгосноор техникийн давхарт гэрчилгээ авч 67 иргэн үл хөдлөх хөрөнгийг эзэмшиж байгаа. Тус байрны иргэдтэй уулзаж Шүүх шинжилгээний байгууллагаас гаргасан үнэлгээгээр 1м.кв-ыг 3.5 сая төгрөгөөр үнэлж хохирлыг барагдуулъя гэсэн боловч оршин суугчдын төлөөлөл энэ байршилд, ийм үнээр дахиж үл хөдлөх хөрөнгө авч чадахгүй. Тиймээс бид хүлээе, нураагаад дахин барих хүртэл түрээсийн асуудлыг шийдэж өгөх хүсэлт гаргасан. Энэ хүсэлтийн дагуу Засгийн газрын нөөц хөрөнгөөс 2025 оны зургаадугаар сар хүртэл түрээсийн мөнгийг иргэд шийдээд өгчихсөн байгаа.

207 дугаар байрны хоёр талд сургууль, орон сууцны барилга байгаа учраас нураахад төвөгтэй, тэсэлгээ хийх боломжгүй байна. Гэхдээ нураалтын тендерийг зохион байгуулахаар ажиллаж байна. Ажлын даалгавар бэлэн болсны дараа тендер зарлаж, өвлийн улиралд ЕБС-ийн сурагчид амарсан үед бага, багаар нураана. Энэ хооронд шүүх хурал болж дуусна гэж бодож байна. Буруутай этгээдээс хөрөнгийг гаргуулах шийдвэр гарвал нийслэлийн төсөв ачааллыг үүрэхгүй. Хэрэв хэрэг хянан шийдвэрлэх ажиллагаа дуусгавар болохгүй бол удахгүй өргөн барих нийслэлийн төсвийн магадлалын төсөлд тусгасан 12.3 тэрбум төгрөгөөр 207 дугаар байрыг дахин барина. Энэ төсвөөр барилгыг барьж дуусгахаар тендер зарлана” гэв.