УИХ-ын ээлжит бус чуулган 2024 оны наймдугаар сарын 15-30 –ны өдрүүдэд болж, долоон өдөр хуралдсан. Тус чуулганы үеэр  хуралдаанд оролцоогүй тасалсан гишүүдийн нэрс нийтэд ил болсон юм. Ингээд та бүхэнд ээлжит бус чуулганы долоон өдрийн хуралдааны ирцийн мэдээллийг танилцуулж байна.

Тус хуралдааны явцад 15 гишүүн чөлөөтэй, 23 гишүүн  нэг ба түүнээс олон давтамжтайгаар тасалсан байна. Мөн 13 гишүүн гадаадад, 6 гишүүн орон нутагт томилолттой байснаар нэг болон түүнээс олон давтамжтайгаар оролцоогүй.  Харин 48 гишүүн 162 удаагийн давтамжтайгаар  хоцорчээ. Үүнээс Д.Ганмаа гишүүн 7 өдрийн хуралдаанд нэг ч өдөр суугаагүй бол Д.Батлут, Х.Баттулга, Ж.Ганбаатар, Б.Пүрэвдорж тэргүүтэй гишүүд 5 өдрийн хуралдаанд оролцоогүй байна.

Д.Батлут гишүүний хувьд 4 удаа тасалж, 1 удаа орон нутагт томилолттой байжээ. Ж.Ганбаатар гишүүн 3 удаа гадаадад томилолттой байсан бол 2 удаа тасалсан.

Харин Б.Пүрэвдорж гишүүн 5 удаа орон нутагт томилолттой гэх шалтгаанаар УИХ-ын ээлжит бус чуулганд оролцоогүй байна.

Энэ талаар УИХ-ын Ерөнхий нарийн бичгийн дарга Б.Баасандорж дараах тайлбарыг хийсэн юм. “Чуулганы ирцийн мэдээг гаргахдаа чөлөөтэй, эмнэлгийн чөлөөтэй, тасалсан, хоцорсон, гадаадад, орон нутагт гэсэн ангиллаар гаргасан. Д.Ганмаа гишүүн 7 удаагийн хуралдаанд УИХ-ын даргын захирамжаар чөлөө авсан Долоодугаар сарын 29-өөс наймдугаар сарын 20-ны өдрүүдэд салбар дундын уялдааг хангах үндэсний хорооны ажлаар АНУ-д хувийн зардлаар явсан. Мөн  наймдугаар сарын 21-есдүгээр сарын 15 хүртэл  салбар дундын уялдааг хангах үндэсний хорооны ажлаар дахин АНУ-д өөрийн зардлаар явсан. Тиймээс Д.Ганмаа гишүүн ээлжит чуулганыг таслаагүй. Албан ёсоор холбогдох дүрэм журмын дагуу чөлөө аваад УИХ-ын даргын захирамж нь гараад  олон улсын хуралд оролцоод ирсэн.

Х.Баттулга гишүүн долоон удаагийн хурлын хоёрт нь суусан. Таван удаагийн хуралд оролцоогүй. Нэг удаа тасалсан бол 3 удаа гадаад, 1 удаа орон нутагт томилолттой байсан” гэв.

УИХ-ын Байнгын хороо болон чуулганы ирцийг 2002 оноос дотоодын болон албан хэрэгцээндээ зориулан гаргаж эхэлсэн бол 2017 оноос УИХ-ын чуулганыг хаахад мэдээлдэг болсон. Харин  2021 оноос сар бүр их хурлын цахим хуудсанд УИХ-ын байнгын хороо болон чуулганы ирцийг олон нийтэд ил тод тавьдаг болжээ.