УИХ-ын Ерөнхий нарийн бичгийн дарга Б.Баасандорж УИХ-ын даргын захирамжаар байгуулсан ажлын хэсгүүд болон УИХ-ын 2024-2028 оны стратеги төлөвлөгөөний талаар мэдээлэл хийлээ.

УИХ-ын ээлжит бус чуулган 2024 оны наймдугаар сарын 15-30 –ны өдөр хүртэл үргэлжилсэн. Тус чуулганаар 30 хууль тогтоол баталж, 53 ажлын хэсгийг байгуулжээ.

Хүний эрх, хууль зүйн хүрээнд 16, төрийн байгуулалтын болон төрийн албаны чиглэлээр  тав, нийгмийн хамгаалал, эрүүл мэнд, боловсролын чиглэлээр ес, эдийн засаг, аж ахуйн үйл ажиллагааны чиглэлээр 16, байгаль орчин, хүрээлэн буй орчны чиглэлээр гураь, хот байгуулалт, дэд бүтцийн салбарын хүрээнд таван ажлын хэсэг байгуулсан.

Эдгээр ажлын хэсгийн 18 нь энэ оны намрын ээлжит  чуулганаар холбогдох санал дүгнэлтээ бэлтгэн танилцуулах бол үлдсэн ажлын хэсгүүд ирэх 2025 оны хаврын чуулганаар санал дүгнэлтээ танилцуулна.  

УИХ-ын Ерөнхий нарийн бичгийн дарга Б.Баасандорж: “2024 оны намрын ээлжит чуулган энэ оны аравдугаар сарын 1-нд эхэлнэ. 2025 оны улсын  төсвийн төслийг Монгол Улсын Ерөнхий сайд өргөн мэдүүлсэн. Шинэ төсвийн  тухай хуулиар УИХ-д есдүгээр сарын 1-нд төсвийн төслөө гарган мэдүүлдэг болсон. Үүнтэй холбоотойгоор УИХ, болон төсвийн байнгын хороо хууль тогтоомжид заасан журмын дагуу аравдугаар сарын 1 хүртэл хугацаанд улсын төсвийн төслийг олон нийтэд хэлэлцүүлдэг, иргэдээс санал хүсэлт авдаг хуультай болсон. Тус төслийг “D-Parliament” цахим хуудсанд байршуулсан байгаа. Мөн иргэд олон нийтийн саналыг авах бэлтгэл ажил хангагдаад, үе шаттайгаар олон нийтийн хэлэлцүүлгийг зохион байгуулж ажиллаж эхэлж байна” гэв.