УИХ-ын ээлжит бус чуулганы нэгдсэн хуралдаан үргэлжилж байна. Энэ үеэр УИХ-ын гишүүн Б.Жаргалан “Өнөөдөр Дэгийн тухай хуульд өөрчлөлт оруулж, төсвийн гүйцэтгэлийг хэлэлцэх гэж байна. Гэтэл материал нь өнөөдөр өглөө ирсэн. Яаж бүтэн жилийн төсвийн гүйцэтгэлийг ганцхан өдрийн дотор материалтай нь танилцаад, хэлэлцэх юм бэ. Төсвийн гүйцэтгэлийн асуудлыг цаг хугацаатай, гишүүдийг материалтай танилцсаны дараа хиймээр байна. Татварын тухай хуулийг хөнгөн хуумгай шийдэж болохгүй” гэсэн юм. Тэгвэл үүнд УИХ-ын дарга Д.Амарбаясгалан дараах тайлбарыг өглөө.

      Тэрбээр  “Засгийн газраас өргөн барьсан хуулийн төслүүдийг нэн яаралтай горимоор хэлэлцэх эсэх асуудлыг чуулганы хуралдаанаар хэлэлцэхээр дэмжсэн. Гишүүд нэн яаралтай хэлэлцье гэж шийдчихээд “Одоо бидэнд уншиж танилцах хангалттай цаг өгсөнгүй” гэх нь зохимжгүй. Мөн “техникийн асуудал” гэж бид техникт буруу өгч байна. Гишүүд санал хураалтад оролцохдоо техниктэй харилцах харилцаа алдагдаж байна. Зарим нь түрүүлж, зарим нь хоцорч кнопоо дарж байна. Программ уншаагүй байхад нь үйлдэл хийснээс болж техник гацаж байгаа юм. Гишүүд анхаараарай” гэв.