2024 оны УИХ-ын сонгуульд нэр дэвших нам, эвслүүд тойрог болон жагсаалтаар нэр дэвших гишүүдээ өчигдөр тодруулж, баталсан. Тэгвэл хамгийн их хэл ам дагуулж, зарим гишүүн нь намаасаа гарах талаараа мэдэгдэл хийгээд байгаа Ардчилсан намын жагсаалтад өнгөрсөн шөнө өөрчлөлт орсон гэх дуулиан дэгдээд байна.  

           Жишээ нь, өчигдөр Ардчилсан намын жагсаалтын 22 дугаарт жагсаж байсан Х.Номингэрэл жагсаалтаас хасагджээ. Тэрбээр цахим хуудаснаа “Хоёр дэлдэнгээрээ яах аргагүй 22 дээр сонссон нэр маань шөнө дунд намын жагсаалтаас алга болчихож. Буянаараа болог” хэмээн мэдэгдсэн.

         Мөн жагсаалтын эхний 25 дугаарт эрэмбэлэгдэж байсан байсан Сангийн сайд асан С.Баярцогт, АН-ын генсек Ц.Баатархүү нар жагсаалтад нэр дэвшиж байсан ч тойрогт дэвшихээр болсон байв.

           ҮБХ-ны хурлын үеэр намаасаа гарна гэдгээ мэдэгдээд байсан УИХ-ын гишүүн асан З.Нарантуяа тойрогт нэр дэвшихээр болжээ. Харин УИХ-ын гишүүн асан Г.Уянга нэр дэвших мандатаа авч чадаагүй тул АН-д тушаасан 16 сая төгрөгөө нэхэмжилж, намаасаа гарах өргөдлөө өгч байгаагаа мэдэгдлээ. Тэрбээр энэ талаараа цахим хуудаснаа “Ардчилсан намын дарга Л. Гантөмөр танаа Гантөмөрийн Уянга миний бие Ардчилсан намын гишүүнчлэлээс татгалзаж, намаас гарч байгаагаа үүгээр мэдэгдэж байна.

         Сонгуулийн тухай хуулийн 30-р зүйлийн 30.3 дахь заалт /нам эвсэл нэр дэвшүүлэхдээ намын гишүүн, дэмжигчээсээ мөнгөн болон мөнгөн бус хөрөнгө, үйлчилгээ, барьцаа, дэнчин авахыг хориглоно/ -ыг зөрчиж авсан 10 сая төгрөгийн хандив, ҮБХ-ны гишүүн биш байтал ҮБХ-ны гишүүний татвар хэмээн авсан зургаан сая төгрөг, нийт 16 сая төгрөгийг буцаан олгоно уу” гэжээ

         Түүний нэгэн адил "Элийрэгч" гэх Ц.Уянга Хан-Уул дүүрэгт горилж байсан ч өөрчлөгдөж, Сонгинохайрхан дүүргээс нэр дэвшүүлэхээр болсон байна. Тойрог солигдсонд Ц.Уянга дургүйцэж,  “АН-аас мөнгөө нэхэж, АН-ыг унагахын төлөө ажиллана” гэжээ. Тэрбээр цахим сүлжээндээ  “Миний гурван сар ажилласан Хан-Уулын тойргийг сэтгүүлч Лодойсамбууд авч өгөөд, Г.Уянгыг надаар сольжээ. Овог ядаж зөв бич. Угаасаа Сонгинохайрханд "шанс"-гүйгээ мэдээд, намайг дуугүй болгох гэж нохойд хаяж байгаа яс болгож байна. Мөнгөө авъя аа.

         Угаасаа ҮБХ-ны нөхөн сонгуульгүй, хуульд заасан ирцийн бүрдэлгүй хурлаар тогтоосон тогтоол чинь хүчингүй. Жагсаалт, тойрог бүгд хууль бус, сонгуулийн өмнө шүүх дээр очоод л будаа болно. Бид нарын тоглоом уу" хэмээн бичсэн байна.

Ардчилсан намын гишүүдийн хувьд өчигдөр орой тун ч хэцүү, хар дарсан зүүд шиг өнгөрлөө. Учир нь, жагсаалтаасаа хасагдчих гээд эсвэл жагсаалтад багтсан нэр нь хойшилж, хэлбэлзээд хэцүүхэн өнгөрлөө.