Засгийн газрын ээлжит хуралдаан боллоо. Хуралдаанаар өвөлжилт, малчдын нөхцөл байдлын талаарх багц асуудлыг хэлэлцсэн юм. Хуралдаанаас гарсан шийдвэрүүдийг салбарын сайд нар танилцуулж байна. Энэ үеэр УУХҮ-ийн сайд Ж.Ганбаатар дараах шийдвэрийг танилцууллаа.

Тэрбээр "Уул уурхайн биржээр зэсээ зарах шийдвэр өнөөдрийн Засгийн газрын хуралдаанаас гарлаа. Ил тод, шударга болж тоглоом ойлгомжтой болно. Дэлхийн зэсийн зах зээл дээр бид томоохон тоглогч, нөөцөөрөө эхний тавд багтдаг. Манай зэс нэр хүндтэй, худалдан авагч тал үргэлж хүлээлттэй байдаг. Тиймээс Монгол Улс зэсийн худалдаанд томоохон тоглох боломж бий. Үүнээс гадна шатахууны нөөцийн тухайд "ОХУ-аас тогтоол гарсан. Гэхдээ хараахан батлагдаагүй байна. Энэ хориг арга хэмжээ бол өмнө нь гарч байсан. Энэ нь зуны түлшнээс өвлийн түлшинд шилжих үед дотоод хэрэгцээгээ хангах шаардлагаар экспортдоо хязгаар тогтоодог үйл явц юм. Ийм асуудал гарна гэдгийг урьдчилаад сонсчихсон байсан учраас нэлээд сайн ажилласан. Тиймээс Монгол Улс энэ хоригт орохгүй гэсэн мэдээлэл ирж байна. Манай улсын хувьд дизель түлшээр бүх саваа дүүргэсэн, евро 92 дүүрэн, энгийн 92 авто бензин хэвийн, хангалттай байна" гэв.