Засгийн газар өнөөдөр цаг агаарын нөхцөл байдалтай холбоотойгоор ээлжит бусаар хуралдав. Ээлжит бус хуралдаанаас гарсан шийдвэрийг Шадар сайд, УОК-ын дарга С.Амарсайхан танилцууллаа.

                           Тэрбээр “Өнөөдрийн Засгийн газрын ээлжит бус хуралдаанд өчигдөр УОК-оор яригдсан асуудлыг хэлэлцэж, Засгийн газраас хэд хэдэн шийдвэр гаргалаа. Тухайлбал, хаваржилтын хүндрэлийг даван туулахтай холбоотой шат дараалсан ажлууд үргэлжилж байгаа. Өнөөдрийн Засгийн газрын хуралдаанаар тэжээл, хужир, өвс болон бусад импортын гурилан бүтээгдэхүүний татварын чөлөөлөх санал гаргаж, УИХ-д өргөн барихаар болсон. Мөн хөдөө, орон нутагт зам гаргах ажил болон ажлыг гүйцэтгэх түлшний асуудлыг хэлэлцэж, эцэслэн шийдвэрлэсэн.

Малын сэг зэмийг цэвэрлэж, устгах ажлыг цаг алдалгүй зохион байгуулах болон түүний зардлыг шийдвэрлэсэн. Түүнчлэн хөдөө, орон нутагт эмнэлгийн анхан шатны үйлчилгээ, эмийг багц хүргэх ажлыг Эрүүл мэндийн сайдаар ахлуулсан Ажлын хэсэг хийхээр болсон. Ингэснээр нийт 21.5 тэрбум төгрөгийн тусламжийг хаваржилт хүндэрсэн орон нутаг, малчин өрхүүдэд үзүүлэхээр шийдвэрлэлээ.

                        Ташрамд дурдахад, өнгөрсөн оны аравдугаар сараас эхлэн өвөлжилтийн нөхцөл байдал хүндэрсэн хөдөө, орон нутаг руу улсын нөөцөөс 17 мянган тонн тэжээл, 8000 тонн өвс хүргэсэн. Мөн өнөөдрөөс эхлэн дахин улсын нөөцөөс хүнд нөхцөлтэй байгаа орон нутгуудад хүргэж ажиллана” гэв.