Баянзүрх дүүргийн 26, 36 дугаар хороон дахь сургууль, цэцэрлэгийн газар чөлөөлөлтийн талаар Нийслэлийн Засаг дарга бөгөөд Улаанбаатар хотын захирагч Х.Нямбаатар мэдээлэл өглөө.

   Тэрбээр “Баянзүрх дүүрэгт 18 тэрбум төгрөгийн төсөвт өртөгтэй барилгын жишиг зургаар 960 хүүхдийн сургуулийн ажлыг яралтай эхлүүл. Хоёрдугаарт, “Олимп” хотхоны ойролцоо барьж сургуулийн барилгыг гацааж байгаа хүмүүст арга хэмжээ авахыг Нийслэлийн барилга хот байгуулалтын газарт үүрэг болгож байна. Тэд барилгын ажлаа эрчимжүүлэхгүй бол газар олголтыг нь хүчингүй болгох арга хэмжээ ав. Олон барилга барьж, ашиг олсон аж ахуйн нэгжүүдийн барилгыг худалдаж авсан иргэдийн сургууль, цэцэрлэгийн асуудлыг шийдэх гэж байна. Кристал таунаас Цэцэрлэгт хүрээлэн хүртэл гарц гаргах ажлыг зохион байгуул. Тендер худалдан авахтай холбоотой ажлуудыг Баянзүрх дүүрэг хариуцна. Хөрөнгийг нь нийслэл хариуцсан. Баянзүрх дүүргийн 36, 26 дугаар хорооны нутаг дэвсгэр дээр сургуулийн барилгыг дуусгаж, дахин шинэ сургууль барь. Өнгөрсөн 30 жилийн алдааг засахаар ажиллаж байгаа гэдгийг иргэд ойлгох хэрэгтэй. Бетонон ширэнгэ үүсгэсэн байдлыг засаж, сургууль, цэцэрлэгтэй болгож, орц, гарцтай болгох ажлыг яаралтай хийхгүй бол байдал хүндэрнэ. 36, 26 дугаар хороонд 40 мянган иргэн амьдарч байна. Тус хороонд нэг ч улсын сургууль, цэцэрлэг байхгүй. Түгжрэлийн гол шалтгаан нь сургууль, цэцэрлэг болж байна. Тус хорооныхонд хандаж хэлэхэд, “Сүмбэр” ордыг эзэмшиж байгаа аж ахуйн нэгжээс дөрвөн мянга хоёр квадратыг авч 960 хүүхдийн сургууль барихаар болсон гэдгийг хэлье” гэв.