Zarig.mn сайтын эрхлэгч, сэтгүүлч Н.Өнөрцэцэгийг өчигдөр саатуулсан. Уг үйл явдалтай холбогдуулан, Zarig.mn сайтын редакц болон МСНЭ хамтарч, мэдээлэл хийлээ. Энэ үеэр МСНЭ-ийн Ерөнхий нарийн бичгийн дарга Б.Ууганбаяр дараах мэдээллийг хийлээ. 

 Тэрбээр “Бид одоо ХЭҮК, болон бусад төрийн байгууллагууд, олон улсын сэтгүүлчдийн холбоонд хандахаар төлөвлөж, ажиллаад явж байна. Сонгуулийн үеэр 4-5 сайт ч хаагдаж байсан түүх бий. Нэг тушаалаар олон сонин хаагдаж байсан нь үнэн. Хэвлэлийн эрх чөлөөг хязгаарласан хууль тогтоомж батлахыг хориглоно гэсэн заалт байхад анзаарахгүй явжээ. Иймд энэ бүхнийг илүү сайжруулах тал дээр мэргэжлийн хуульчидтай хамтарч ажиллана. Шуудай дахь үхрийн эвэр шиг байвал боомилох, хязгаарлах эрсдэлүүд нэмэгдсээр байна. Асуулт асуусныхаа төлөө, иргэдийн мэдэх эрхийг хангасныхаа төлөө эрүүгийн хуулиар ял тулгуулдаггүй л байх ёстой” хэмээв.