УИХ-ын гишүүн Ц.Туваан Төв аймгийн Эрдэнэсант суманд ажиллаад ирсэн талаараа болон цаг үеийн нөхцөл байдалтай холбоотойгоор сэтгүүлчдэд мэдээлэл өглөө.

Тэрбээр “Анх Эрдэнэсант суманд болж буй нөхцөл байдалтай холбоотой мэдээллийг маш цочирдож хүлээж авсан. Олон хүний амь эрсэдсэн Эрдэнэсант суманд газар дээр нь очиж ажиллаад ирлээ. Зөвхөн Төв аймгийн Эрдэнэсант, Лүн сум ч бус Өндөрширээт, Бүрэн сумын нөхцөл байдал хүнд байна. Айлууд өвөлжөө рүүгээ нүүж чадалгүй намаржаандаа үлдсэн эсвэл цаг үетэй холбоотойгоор өвөлжөөний нөхцөл байдал нь хүндэрсэн ч айлууд байна. Тэр бүрд сум, орон нутгийн Онцгой байдлын хэлтэс очиж ажиллаж байгаа. Гэсэн ч байгалийн давагдашгүй хүчин зүйлийн эсрэг үнэхээр хүчин мөхөсдөж байна.

                      Талийгаачдын ар гэртэй очиж уулзсан. Ард нь үлдсэн хүүхдүүд үнэхээр хэцүү байдалтай байна. Амиа алдсан иргэд малдаа яваад цасан шуурганд төөрсний улмаас амиа алдсан. Бид 1990 оны шилжилтийн үеийн эдийн засагтай орон биш. Цас түрж арилгадаг машин, техникийг авмаар байна. Малчин өрх бүрийг байршил тогтоогчтой болгох хэрэгтэй. Хэрэв тийм байсан бол ухаалаг төхөөрөмж ашигладаг ямар ч хүн байршлыг нь тогтоогоод, төөрөх эрсдэлгүй болно” гэв.