МҮОХ-ны газар дээр баригдаж буй барилгын ажлыг зогсоох шийдвэр хууль хяналтын байгууллагаас гаргасан. Гэвч тус компанийн зүгээс шийдвэрийг эсэргүүцэж, барилгын ажлыг эхлүүлж, төмөр хашаа босгоод байгаа юм. Энэ нь оршин суугчдын эсэргүүцэлтэй нүүр тулгараад буй. Тухайлбал уг газрыг Олимпийн хорооны өмчлөлийн байртай нь цуг олимпын аварга Э.Бадар-Ууган авсан аж.

Тэгвэл тус төвийн ард талд дахин барилга барьж эхэлсэн нь барилга хоорондын зайг зөрчиж, оршин суугчдын амгалан тайван байдлыг алдагдуулж байгаа юм. Энэ талаар орчин суугчид “Шөнө оройгоор барилгын ажлыг үргэлжлүүлж, амар тайван байдлыг алдагдуулдаг” гэлээ.

          Олимпийн аварга Э.Бадар-Ууганы МҮОХ-ны газарт буюу “Өөжин Мэд” эмнэлгийн чанх хойд талд 20 давхар орон сууцны хороолол барихаар барилгын ажлаа эхлүүлжээ. Ингэхдээ барилгын талбайн хажууд байрлах барилгаас таван метр хүрэхгүй зайд өрөмдлөг хийснээс үүдэн ойролцоо байрлах Yamaha барилгад чичирхийлэл мэдрэгдээд байгаа аж. Үүнээс гадна оршин суугчид холбогдох байгууллагуудад барилга баригдаж буй газрыг чөлөөлж, хууль бус газрын зөвшөөрлийг нь цуцлах хүсэлт хүргүүлжээ. Харин Хот байгуулалтын хөгжлийн газраас шалгалт хийж, улмаар барилгын ажлын зөвшөөрлийн гэрчилгээг цуцлах шийдвэр гаргасан байна.