Нийтийн тээвэрт парк шинэчлэлийн хүрээнд “Тэнүүн Огоо” ХХК БНСУ-аас 600 шинэ автобус оруулж ирэхээр болсон. Улмаар эхний ээлжид Монголд ирсэн 100 автобусыг танилцуулахад стандартын шаардлагад нийцэхгүй, хуучин автобусыг засаж, янзлаад нийлүүлсэн байж болзошгүй гэх маргаан өрнөөд буй. Тэгвэл өнөөдөр УИХ дахь МАН-ын бүлэг хаалттай горимоор хуралдаж, нийслэлийн Засаг дарга бөгөөд Улаанбаатар хотын захирагч Д.Сумъяабазарыг эгүүлэн татах асуудлаар ярилцаж байгааг эх сурвалж мэдээлсэн. Үүнтэй холбоотойгоор хотын дарга Д.Сумъяабазар хэвлэлийнхэнд мэдээлэл өглөө.

Тэрбээр “Миний бие ёс зүйн хариуцлага хүлээж, өөрийн хүсэлтээр хотын даргын албан үүргээ хүлээлгэн өгч байгаагаа албан ёсоор мэдэгдэж байна. Би өөрийн хүсэлтээр ажлаа өгч байгаа. Огцорсон зүйл биш. Тиймээс энэ асуудлыг битгий улс төржүүлээсэй гэж хүсэж байна. Ерөнхий сайдтай уулзахдаа “Дараагийн хотын даргыг таны зүгээс сонгох нь зөв гэж бодож байна” гэдгээ хэлсэн. Манай хотын ажил зогсож болохгүй. Тиймээс дараагийн хотын дарга миний хийж байсан ажлуудыг үргэлжлүүлээсэй гэж хүсэж байна. Би хотын даргын ажлыг авснаасаа хойш үнэхээр хүнд үеүдтэй нүүр туллаа. Эрх зүйн реформ хийхгүйгээр Улаанбаатар хотын байдлыг сэргээнэ гэдэг хүнд ажил юм байна.

                            Харин автобустай холбоотой асуудлыг хууль, хяналтын байгууллага нэн даруй шалгаасай. Улсын төсвийн мөнгөтэй холбоотой энэ хэргийг яаралтай шүүн тунгааж, үнэн мөнийг гаргаж ирэх хэрэгтэй. Харин миний зүгээс монгол эр хүний хувиар уучлалт хүсэж байна. Надад өөр сонголт үгүй байхад ширэн нүүрлээд байж чадахгүй. Би хууль тогтоох, гүйцэтгэх засаглал, уул уурхайн салбарт ч ажиллаж байсан. Гэхдээ хотын даргын ажил их зовлонтой бөгөөд хүнд ажил юм байна шүү гэдгийг хэлье. Нийслэлийн иргэддээ дараагийн хотын даргаа хайрлаж яваарай гэж захья” гэв.