Дэлгэр зуны налгар талд, дэлхийд ганцхан дээлтэй Монгол наадам үргэлжилж байна. Нар ээж, хур тэгширсэн энэ л өдрүүдэд Үндэсний их баяр наадам тохиж байгаа билээ. Хүчит бөхчүүд нь барилдаж, хурдан морьд нь уралдаж, харваачид нь цэц мэргэнээ сорьдог түүхт баярын өдрүүдэд монгол хүн бүрийн сэтгэлийг дэвтээж, омогшуулж, хожим дурсах гэгээн дурсамжуудыг үлдээх олон сайхан агшин тохиодог билээ. Тэгвэл наадмын эхний өдрүүдэд тохиосон онцлох үйл явдлуудыг хүргэж байна..

ЗАЛУУ НАЙРУУЛАГЧИЙН ШИНЭЛЭГ НАЙРУУЛГА

Тулгар төрийн 2232, Их Монгол Улс байгуулагдсаны 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жилийн ой, Үндэсний их баяр наадмын ерөнхий найруулагчаар “Скин” энтертайнментын найруулагч Б.Анар ажиллаа. Залуу найруулагчийн найруулсан наадмн нээлтийн үйл ажиллаагаа нүд хучирлаж, чих баясгам болсон хэмээн иргэд ам сайтай байна. Тэрбээр энэ жилийн наадмын нээлтийн үйл ажиллагааг "Эв мөнхийн тусгаар Монгол” нэрэн дор зохиомжилж байгаа мэдэгдсэн юм.

ҮНДЭСНИЙ ИХ БАЯР НААДМЫГ МОНГОЛ РЕППЕРҮҮД НЭЭЛЭЭ

    Үндэсний их баяр наадмын нээлтийн үеэр залуу дуучин, уран бүтээлчдийг харах,нь ховор тохиолдол билээ. Тэгвэл энэ жилийн баяр наадмын нээлтээр нийтийн, рок поп, хип хоп гээд олон урсгалын уран бүтээлчдийн үзүүлбэрийг үзлээ.Тэр дундаас яах аргагүй онцгой байсан нь реппер Big Gee  болон Mo'g байлаа. Энэ нь анх удаа репперүүд наадмын нээлтийг хийсэн тохиолдол байлаа. Найруулагч Б.Анарын хэлж буйгаар нээлтэд оролцсон уран бүтээлчдийн дуу бүр эв нэгдлийг илэрхийлсэн, бэлгэдсэн гэдгийг хэлсэн юм

120 МОРИНЫ ҮЗҮҮЛБЭР

      Жил бүрийн наадмын нээлтийн үеэр морьт харвааны үзүүлбэр, морьдоо,хөтөлсөн үндэсний дээл хувцсаараа гоёсон иргэд, морьт цэргийн цуваа гээд олон үзүүлбэрт морь оролцуулдаг билээ. Тэгвэл энэ жилийн нэгэн шинэлэг бөгөөд онцлох үйл явдал нь 120 морь оролцсон наадмын нээлт гэдэг байв. Төв цэнгэлдэх хүрээлэнгийн ногоон талбайн хоёр талаас давхилдан талбайн голд уулзалдаж нэгнийгээ ноолоох гүү, унага хоёр энэ нээлтийн уярам хэсгийн нэг байлаа.

УЛАМЖЛАЛ, ТҮҮХИЙГ ОРЧИН ҮЕИЙН ТЕХНОЛОГИТОЙ ХОСЛУУЛАВ

       Үндэсний их баяр наадмын үзүүштэй хийгээд омогшуулсан онцлог зүйлсийн нэг нь AR технологийн үзүүлбэрүүд байлаа. Нээлтийн үзүүлбэр бүрд тохиорсон өвөрмөц виртуал зураглалууд бодит байдлыг хийсвэр дүрслэлтэй хоршуулсан нь шууд дамжуулалт үзэж буй үзэгчдэд уйдамгүй сонирхолтой, содон шийдэл байлаа.

ҮЗЭГЧДИЙГ СУУДЛААС НЬ ӨНДӨЛЗҮҮЛСЭН БАРИЛДААН

      Монгол Улсын нийслэл Улаанбаатар хотод Үндэсний их баяр наадмын нээлт болж,  бөхийн барилдаан эхэлсэн билээ. Газар газрын наадам уухайн дуутай үргэлжилж байна. Үзүүр түрүү бөхийн барилдаан шиг үзэгчдийг суудлаас нь өндөлзүүлсэн барилдаан Дархан-Уул аймгийн 6-9 насны хүүхдүүдийн барилдааны үеэр боллоо. Бие жижиг ч ур ухаан, хүч тэнхээ, уран барилдаанаар өөрөөсөө өндөр, жацтай хүүг өвдөг шороодуулж, цэнгэлдэх дүүрэн үзэгчдийг огшуулсан зургаан настай А.Соёмбо хүү  Дархан-Уулын аймгийн цэнгэлдэх даяар уухайн дуу цуурайтууллаа.