Засгийн газрын ээлжит хуралдаанаар Монгол Улсын 2023 оны төсвийн тухай хуульд өөрчлөлт оруулах асуудлыг хэлэлцлээ. Тухайлбал,  МАН-ын бүлэг хүүхдийн мөнгийг долдугаар сарын 1-нээс бүх хүүхдэд олгож, мөн цалин, тэтгэврийг нэмэх шийдэлд хүрсэн талаар Сангийн сайд Б.Жавхлан дараах мэдээллийг хийлээ.

   Тэрбээр “2023, 2024 онд учирч болох гадаад өрийн дефолтоос бид бүрэн ангижирсан. Үүний үр дүнд төсөв тодотгох боломж гарсан гэж хэлж болно. Өрхийн орлогыг яаж нэмэх вэ гэдэг асуудлыг хөндөж ирсэн. Цалин, тэтгэвэр тэтгэмж нэммээр байдаг. Гэтэл дайны нөхцөл байдалтай уялдан инфляц хүнд байсаар байсан. Төсөв тодотгож цалин, тэтгэвэр нэмж байгаа нь сонгуулийн шоу биш. Бидэнд гарсан хамгийн эхний боломж юм. Хойшлох, сонгууль дөхөх тусам янз бүрээр хэлэгдэх байх. Өнгөрсөн гурван жилийн хугацаанд геополитикийн дараалсан хүнд сорилтыг даван туулж ирлээ. Төсвийн алдагдлыг нэмэгдүүлж, “ковид-19”-ийн цар тахлын хүндрэлийг санхүүжүүлж ирсэн. Өнгөрсөн онд гадаад валютын нөөц хоёр тэрбум ам.доллар байна гэж байсан бол 3.8 тэрбум ам.долларт хүрлээ. Дараах таван ажилд нийт 1.8 их наяд төгрөг зарцуулах болсон тул төсөв тодотгох шаардлага үүссэн. Тухайлбал, Хүүхдийн мөнгийг хүсэлт гаргасан өрх бүрд нөхөж олгох, Төрийн зарим албан хаагчийн суурь цалинг нэмэх, Нийслэлийн замын түгжрэлийг шийдэх Халамжийн хэмжээг өсгөх, 1.8 их наяд төгрөгөөр төсвийн зардал өслөө. Энэ нь бага мөнгө биш. Тиймээс бүх нөөцөө дайчлах шаардлагатай. Энэ онд татвараас, НӨАТ-өөс чөлөөлөх хууль батлахгүй" гэлээ.