Өнөөдөр Цахим хөгжил, Харилцаа холбооны яамнаас Нийслэл болон аймаг сумдын үе үеийн засаг дарга нарын сүүлийн 20 жилийн хугацаанд захирамж гаргаж холбогдох газрын албанаас олгосон газрын мэдээллийг шилэн болгож буйгаа мэдээллээ. Тэгвэл энэ талаар ЦХХХ-ны сайд Н.Учрал дараах мэдээллийг хүргэлээ.

Тэрбээр "Газар олгосон сүүлийн 20 жилийн түүхэнд хотын дарга асан Э.Бат-Үүлийн гарын үсэг ч байна. МАН-ын гишүүн, хотын дарга нарынх бүр олон байгаа. Баримт худлаа хэлдэггүй. Баримт юу хэлэв гэдэг бүр их чухал. Нийслэлийн үе үеийн засаг дарга нар 20 жилийн хугацаанд 36000 гаруй газар олголтын захирамжийг гаргасан байсныг ил тод болгож байна. Мөн зориулалтыг нь өөрчилсөн газрууд маш их бий. Жишээ нь тухайн үеийн Нийслэлийн засаг дарга захирамж гаргахдаа ногоон байгууламж барих зориулалтаар захирамж гаргасан байтал түүнийг авсан компани нь бусдад арилжаалж газраа зарсан тохиолдолд нь хотын дарга нь дахин шинэчилж компанийн нэр дээр нь захирамж гаргадаг. Үүний цаана зориулалтыг нь өөрчилсөн тохиолдлууд олон байна. Дээр нь газар эзэмшиж байгаа ААН-ийн тухайн газрын эцсийн өмчлөгчийг хайхаар нэг л өмчлөгчтэй тохиолдлууд гарч байгаа. Ерөнхий сайдын өгсөн албан даалгаврын хүрээнд цаашид мэдээллээ дутуу ирүүлсэн төрийн захиргааны болон үйлчилгээний байгууллагуудыг АТГ-т өгч шалгуулах процесс өрнөхийг анхааруулж байна" гэлээ.