С.Зоригийн хэрэгт буруутгагдаж, гурван шатны шүүхээс 20-25 жилийн хорих ял сонссон Т.Чимгээ, Б.Содномдаржаа нарт холбогдох хэргийг хэрэгсэхгүй болгож, хаасан талаар НПГ-аас мэдэгдлээ. Тодруулбал, НПГ-аас дээрх иргэдийг гэмт хэрэг үйлдсэн гэдгийг нотлох баримт хангалттай байхгүй учраас ялласан тогтоолыг хүчингүй болгосон гэв. Мөн хүчингүй болгосон шийдвэрийг хянах ажиллагаа явагдаж байгаа ажээ. Хянах ажиллагаа дууссаны дараа хэрэгсэхгүй болгосон шийдвэрийг хэргийн оролцогч нарт танилцуулах аж. Одоогийн байдлаар албажаагүй байгаа гэсэн үг.

Бид С.Зориг агсны хэрэгт буруутгагдаж, гурван шатны шүүхээс 25 жилийн хорих сонсож, зургаан жилийн ял эдлээд байгаа Б.Содномдаржаатай холбогдож, энэ талаар тодруулах гэсэн боловч хөдөө яваад эзгүй байлаа.

Харин Б.Содномдаржаагийн ээж Б.Жавзмаа “Хүүг минь цагаатгаж, хэргийг нь хүчингүй болгож байгаа мэдээллийг цахим орчноос уншлаа. Хуулийнхны ажил албан ёсоор дуусаагүй учраас бидэнд мэдэгдээгүй байгаа бололтой. Миний хүү ажлаар хөдөө явсан. Өөрийг нь цагаатгасныг сонсоод хачин их баярлах байх. Бид сайхан мэдээ уншаад жигтэйхэн баярлаж байна. Гэхдээ миний хүүг хэлмэгдүүлж, амьдралаар нь бусниулж, сүйтгэсэн хүмүүст гомдож байна. Зургаан жилийн амьдрал нь өргөст торны цаана өнгөрч, зовсон шүү дээ. Эцэст нь, цагаатгагдсан ч бие муутай, амьдралын боломж тааруу нэгэн болж хувирлаа. Сэтгэл санаагаар маш их хохирсон. Би хүүгийн өмнөөс харамсаж, гомдож явдаг. Гэхдээ нуруу дээрээс хүнд хар чулуу авчихсан юм шиг сайхан байна. Хурдхан шиг тогтоол нь албажиж ирээсэй” гэсэн юм.