УИХ дахь АН-ын бүлгээс Олон нийтийн сүлжээнд хүний эрхийг хамгаалах тухай хуулийн төслийн талаар мэдээлж байна. Энэ үеэр  АН-ын гишүүн, УИХ-ын гишүүн О.Цогтгэрэл дараах байр суурийг илэрхийллээ. 

Тэрбээр "Олон нийтийн сүлжээнд хүний эрхийг хамгаалах тухай гэсэн гоё нэртэй хуулийн төсөл оруулж ирсэн. Үүнд байр сууриа илэрхийлэх шаардлага гарч ирлээ. Учир нь энэ нь хүний үзэл бодлоо илэрхийлэх эрхэд халдсан, хязгаарлалт хийх гэсэн, албан ёсны цахим хуудсуудыг хаах эрхийг өгөх гэсэн олон зүйлс үүний цаана байна. Хүн гүтгэх хуулиар хориотой, үүнийг хуулиар зохицуулаад явдаг. Гэтэл энэхүү хууль нь олон нийтийн сүлжээнд харин хүний эрхийг зөрчсөн, дарга нарын эрхийг хамгаалах зорилготой заалттай хуулийн төсөл болжээ. Уг хуулийн төслийг үргэлжлүүлэн хэлэлцэхийг дэмжихгүй байна. Мэдээж хэрэгтэй зүйлс, заалт бий. Тиймээс хүний эрхийн байгууллага гараад хаврын чуулганаар хэлэлцэх саналтай байна. Аливаа хуулийн хэлэлцэхэд үндсэн шаардлага байдаг. Монгол Улсын гурван сая хүн амд хамаатай хууль. Төсөлд олон нийт, мэргэжилтнүүдийн санал бодлыг тусгах ёстой байдаг ч бараг 48 цагийн дотор хэлэлцээд батлах гэж буй нь хууль зөрчсөн үйлдэл юм. Хуулийг батлаад ирэх сард буюу хоёрдугаар сарын 1-нээс мөрдөх гэж байна. Яагаад ийм яаралтай батлах шаардлага гарав. Ухралт болсон зүйл, заалт байна гэж АН үзэж байгаа тул хуулийн төслийг одоо хэлэлцэхийг дэмжихгүй" гэв