2022 он бол Япон Улс, Монгол Улсын хувьд дипломат харилцаа тогтоосны 50 жилийн тэмдэглэлт ойн жил бөгөөд хоёр орны Засгийн газар “Япон, Монголын хүүхэд залуучуудын найрамдал, солилцооны жил” болгохоор шийдвэрлэн цаашдын хоёр орны харилцааг авч явах залуусын бие биеийнхээ улс орон, ард түмний талаарх ойлголтыг гүнзгийрүүлэхийг зорилтынхоо нэг болгохоор тогтсон. Та бүхний ачаар нэг жилийн турш хоёр улсад улс төр, эдийн засаг, соёл, боловсрол, спорт зэрэг салбарт нийт 150 гаруй ойн тэмдэглэлт арга хэмжээг амжилттай зохион байгууллаа. Миний бие эдгээр арга хэмжээнд оролцсон хүмүүсээс хоёр орны харилцааг бэхжүүлье гэсэн чин хүсэл, идэвх зүтгэлийг өөрийн биеэр мэдэрсэндээ сэтгэл тэнүүн байна. Тэмдэглэлт арга хэмжээг зохион байгуулахад хүчин чармайлт гаргасан болоод эдгээрт оролцсон Та бүхэн дахин талархал илэрхийлье.

Дипломат харилцаа тогтоосны 50 жилийн ойн төгсгөлд дээд, өндөр түвшний айлчлал болох Ерөнхийлөгч У.Хүрэлсүхийн Япон Улсад хийсэн албан ёсны айлчлалыг 2022 оны 11 дүгээр сарын 29-нөөс 12 дугаар сарын 2-ны өдрүүдэд зохион байгуулсан бөгөөд Ерөнхий сайд Ф.Кишида болон Ерөнхийлөгч У.Хүрэлсүх нар өнөөг хүртэлх “Стратегийн түншлэл”-ийн харилцааг “Энх тайван, хөгжил цэцэглэлтийн төлөөх Тусгай стратегийн түншлэл” болгон шат ахиулахаар хамтарсан мэдэгдэл болон ирэх 10 жилийн үйл ажиллагааны хөтөлбөрөө зарласан. Хоёр улс 50 жилийн турш бий болгож ирсэн харилцан итгэлцсэн, найрамдалт харилцаандаа тулгуурлан цаашид хоёр улс, хоёр ард түмний хөгжлийн төлөө үргэлжлүүлэн хамтран ажиллахын хамт олон асуудалтай тулгарч буй олон улсын хамтын нийгэмлэгийн энх тайван, хөгжил цэцэглэлтэд оруулах хувь нэмрээ нэмэгдүүлэхээр зорьж байна.

Япон Улсаас Монгол Улсад суугаа Элчин сайдын яамны зүгээс ч цаашид хоёр орны найрамдалт, хамтын ажиллагааны харилцааг өргөжүүлэн гүнзгийрүүлэхийн төлөө бүхий л хүчээ дайчлан ажиллах тул Та бүхнээс дэмжиж, хамтран ажиллахыг хүсье.

2023 он бүх хүмүүсийн хувьд эрүүл энх, ололт амжилтаар дүүрэн он жил байгаасай хэмээн чин сэтгэлээсээ хүсэн ерөөе.