Улсын их хурлын өнөөдрийн чуулганы хуралдаанаар 11 хуулийн төслийг хэлэлцэж байна. Монгол улсын төсвийн гүйцэтгэл, Засгийн газрын  2021 оны санхүүгийн нэгтгэсэн тайлан, Монгол Улсын Ерөнхийлөгчөөс өргөн мэдүүлсэн УИХ-ын тогтоолын төслийг хаалттай хэлэлцүүлэх болсон. Энэ үеэр УИХ-ын гишүүн Ж.Ганбаатар дараах байр суурийг илэрхийллээ. 

Тэрбээр, "Төсвийн алдагдал өнгөрсөн онд бараг гурван их наяд болсон. Тэгэхлээр алдагдалгүй яаж ажиллаж, ямар бодлого боловсруулах талаар мэдээлэл өгөх хэрэгтэй байна. Мөн зээл санхүүжилт дээр ханшийн зөрүү зэрэг тодорхойгүй асуудал их байна. Цаашид яавал төсвийн орлогыг үр дүнтэй болгож, гадаадаас авч байгаа зээлийг хэрхэн үр ашигтай болгох талд онцгой анхаарах хэрэгтэй. Ард иргэдийн амьжиргааны түвшин өдөр ирэх бүрд доройтож байна. Тиймээс Хөгжлийн яам энэ асуудалд төвлөрөх чухал. Төсвийн гүйцэтгэл дээр Хөгжлийн яам бодлого гаргаж, төлөвлөх шаардлагатай. Гүйцэтгэл дээр дүгнэлт гаргаж, бодлого гаргах хэрэгтэй. Атал өнөөдөр бүх зүйл дээр Сангийн яамны бодлого л яваад байх юм" гэв.