Засгийн газрын ээлжит хуралдаанаас гарсан шийдвэрийг албаныхан танилцуулж байгаа билээ. Энэ үеэр ТӨБЗГ-ийн дарга Б.Цэнгэл дараах шийдвэрийг танилцууллаа.

Тэрбээр "Засгийн газраас өргөн барьсан "Төрийн болон, төрийн өмчийн оролцоотой компанийн тухай" хууль УИХ-аар дэмжигдээд явж байна. Энэ хууль батлагдсанаар улсын үйлдвэрийн газар гэх статус байхгүй болно. Цаашид төрийн болон төрийн өмчит компанийг байгуулах үндэслэл, журмыг хуульчилж, нарийн зохицуулалт оруулж байна. Олон улсын нийтлэг хувьцаат компани эсвэл хязгаарлагдмал хувьцаат компани гэсэн олон улсын нийтлэг жишиг рүү орохоос өөр арга байхгүй.
Засгийн газрын хуралдаанаар 2022-2023 онд Хөрөнгийн биржээр дамжуулан төрийн өмчит 25 компанийн жагсаалтыг гаргаж,  олон нийтийн нээлттэй хувьцаат компани болгох шийдвэр гаргалаа. Үүнд, Монголын хөрөнгийн бирж, Монголын цахилгаан холбоо, Мэдээлэл холбоо сүлжээний газар ХК-ийн 34 хүртэлх хувийг хувьцаа гаргах замаар олон нийтийн хяналтад оруулахаар шийдвэрлэлээ. 2022 онд Монголын хөрөнгийн биржийн 34 хүртэлх хувийг хувьчилж, олон нийтийн нээлттэй компани болгохоор шийдвэрлэлээ. Монголын хөрөнгийн бирж 2021 онд таван тэрбум төгрөгийн орлоготой, гурван тэрбум орчим төгрөгийн ашигтай ажилласан, 50 гаруй ажилтантай байгууллага. Хувьчлахдаа хувьцааны төвлөрөл бий болгохгүй. Өөрөөр хэлбэл, нэг хувьцаа эзэмшигчид таван хувиас дээш хувьцааг санал болгохгүй. Ингэснээр жижиг хувьцаа эзэмшигчдийн эрх ашгийг хамгаалж буй юм. Олон нийтийн хяналтад оруулах бэлтгэл ажил зургаан сарын хугацаанд үргэлжилнэ. Үүний дараа 2023 оны нэгдүгээр улиралд Монголын цахилгаан холбоо ХК-ийн 34 хүртэлх хувийг олон нийтийн хяналтад оруулах төлөвлөгөө гаргаад байна” гэлээ.