Ерөнхий сайд өнгөрсөн жилүүдэд хэд хэдэн сайдад “хар толгойгоороо” хариуцах тодорхой үүрэг даалгавар өгч байсан. Мөн цөөнгүй сайд “Би хар толгойгоороо хариуцна. Та нар битгий оролц” гэсэн амлалт ч өгч, тайлбар хийж байсан удаатай. Гэтэл бодит байдал дээр нэг ч сайд хар толгойгоороо дэнчин тавьсан үүрэгт ажлаа биелүүлж чадаагүй байна. Ийнхүү амласандаа хүрсэн бол толгойгүй болчихсон байх ёстой төрийн томчуудын заримыг сануулъя.

 

Дарханы замыг ашиглалтад оруулахыг сайд Б.Энх-Амгаланд даалгасан

 

Ерөнхий сайд, МАН-ын дарга Дарханы зам засварын ажлын нээлт дээр 2019 онд багтааж ашиглалтад оруулахыг сайд Б.Энх-Амгаланд үүрэг болгон, “толгойгоороо хариуцахыг” даалгасан. Тухайн үед “Тэгэлгүй яах вэ” гэж толгой дохин гүйж явсан салбарын сайд Б.Энх-Амгалан тун удалгүй “Миний мэддэг орос хэл дууссан” гэх маягаар ажил хийж чадахгүйгээ зарласан. Энэ нь цаагуураа МАН-ын нэр хүндэд муугаар нөлөөлөх шалтгааныг улам лавшруулсаар. Дээр нь ЗТХЯ-ны Зам ашиглалт хариуцсан мэргэжилтэн нь Дарханы замын ажил гүйцэтгэгч хятадуудаас олон сая төгрөгийн хахууль авч байгаад гардуулсан нь “муу дээрээ муухай, муухай дээр улцан” гэгч болсон. Гол нь Дарханы зам засвар одоо ч дуусаагүй байна. 

Махны үнэ өсвөл Ч.Улаан “толгойгоороо хариуцаарай” гэжээ

 

Ерөнхий сайд У.Хүрэлсүх Засгийн газрын хурал дээр Ч.Улаан сайдад албан ёсоор үүрэг даалгавар өгч байсан. Тэрбээр “Ирэх жил мах, гурилын үнэ тэнгэрт хадвал ХХААХҮ-ийн сайд Ч.Улаан та толгойгоороо хариуцна шүү. Үүнийг би эртхэн хэлчихье. Эртхэн шиг зохицуулалтаа хийгээрэй, арга хэмжээгээ аваарай. Мал нядалгаа эхлэхээс өмнө би үүнийг хэллээ шүү. Зохицуулалт хийж чадахгүй алдчихаад янз янзын учир шалтгаан, тайлбар тавиад байх шаардлага байхгүй шүү. Үүнийг анхааралдаа ав” гэсэн юм. Чуулганы үеэр үүрэг авсан Ч.Улаан сайд мөн л толгой дохин, хөл зэрэгцүүлж байсан ч махны үнэ огт буугаагүй улам өссөөр өнөөдөрт хүрч байгаа билээ. 

 

Нийслэлийн цэвэрлэх байгууламжийг Х.Баделхан хар толгойгоороо хариуцах ёстой

 

Мөн Ерөнхий сайд У. Хүрэлсүх "Нийслэлийн цэвэрлэх байгууламжийг шинэчлэх, барих асуудлыг Барилга хот байгуулалтын сайд Х.Баделхан та хар толгойгоороо хариуцан ажил” хэмээн танхимын сайддаа үүрэг даалгавар өгсөн удаатай. Тэр үеэрээ Ерөнхий сайд “Ажил хийх хүмүүс хариуцлагаа үүрч, асуудлаа шийдэж чадахгүй бол чаддаг хүнийг нь сонгоно” хэмээн сануулга өгсөн. Өөрөөр хэлбэл, нийслэлчүүдийн хувьд өмхий үнэртэх бүртээ “Х.Баделхан сайдын толгойг санаж”, ажлын ахиц шаардаж байхыг Ерөнхий сайд хэлсэн юм. Гэвч цэвэрлэх байгууламжийн үнэр үнэртсэн хэвээр байгаа юм. 

 

Ерөнхий сайд асан С.Баяр “Оюутолгойн гэрээг хар толгойгоороо хариуцна” гэж байв

 

Ерөнхий сайд асан С.Баяр нэгэн цагт “Оюутолгойн гэрээг би хар толгойгоороо хариуцна” хэмээн ам гарч байсан. Оюутолгойн гэрээ Монгол Улсад өөр олон том хөрөнгө оруулалт дуудсан ч Монголын авлигачин улстөрчдийг хахуульдаж байгаад баялгийг нь маш бага татвар төлөөд зөөж болох юм гэдэг сэдлийг гаднынханд өгсөн муу талтай. Тиймдээ ч Монголд олон шударга бус хөрөнгө оруулагчид орж ирж, Арбитрийн шүүхэд өгч Монгол Улсыг хохироосон. Тухайлбал, С.Баяр Дорнодын Ураны ордыг Канадын “Хан Ресурс”-аас булааж оросуудад өгсний улмаас Монголын Засгийн газар Арбитрийн шүүх дээр ялагдаж, “Хан Ресурс”-т 100 сая ам.доллар төлсөн.

 

Ч.Сайханбилэг “Дубайн гэрээг хар толгойгоор хариуцна” гэжээ

 

Ерөнхий сайд асан  Ч.Сайханбилэг хоёр компани хоорондын асуудал, энэ асуудалд Засгийн газар оролцоод байх шаардлагагүй, хоёр компани асуудлаа өөрсдөө шийдээд явна, та нар битгий эсэргүүцээд бай, хэрэв сүүлд янз бүрийн асуудал үүсвэл би өөрөө хар толгойгоороо хариуцна гэж хэлээд алх цохиж байсныг монголчууд мартаагүй биз ээ. Ийнхүү олон сайд, улстөрчид өөрийн хэлсэн амлалтаа биелүүлж чадахгүй хүчин мөхөсдөж байна.