УИХ дахь Ардчилсан намын бүлэг өнөөдөр мэдээлэл хийлээ. Тэд бүлгийн хурлаараа хоёр асуудал хэлэлцэж шийдвэрлэсэн байна. Тодруулбал, Хувийн тэтгэвэрийн хуулийн төсөл болон хамт өргөн мэдүүлсэн хуулийн төслийг хэлэлцэх нь зүйтэй гэж үзжээ. Тус бүлгийн зүгээс өрсөлдөхүйц тэтгэврийн даатгалын сангууд бий болгох нь зүйтэй гэж үзсэн талаар бүлгийн дарга Д.Ганбат хэллээ. Мөн 270 мянган хүнийг хамарсан тэтгэврийн доод хэмжээг нэмэгдүүлэх тухай хуулийн төслийг УИХ дахь АН-ын бүлгээс өнөөдөр өргөн барих гэж байгаа гэнэ. Энэ талаар УИХ-ын дэд дарга С.Одонтуяа танилцууллаа. Тэрбээр "АН-ын бүлэг өндөр настны тэтгэврийн доод хэмжээг нэмэгдүүлэн олгох тухай хуулийн төслийг санаачлаад өргөн барих гэж байна. Доод хэмжээ гэдэг нь 500 мянгаас дээш тэтгэвэртэй байх хуулийн төсөл байгаа. Өнөөдөр 500 мянгаас доош тэтгэвэр авна гэдэг бол амьжиргаанд хаана ч хүрэхгүй. Үндэсний статистикийн хорооны гаргасан судалгаагаар өрхийн дундаж зарлага 1,5 сая төгрөг байна. Хоёр ахмад нийлээд ч тэтгэврийн мөнгөөрөө амьжиргааныхаа гуравны нэгийг ч бүрдүүлж чадахгүй байна. Өнөөдөр 441 мянган иргэн тэтгэвэр авч байгаагаас бараг 300 мянган иргэн нь 500 мянгаас доош төгрөгийн тэтгэвэр авч байна. Энэ бол ахмадуудыг ядууралд хүргэж байна. Социализмын үеийн бүтээн байгуулалтад оролцож байсан, хувийн өмч байхгүй ахмадууд хамгийн бага тэтгэврийг авч байна. Ардчилсан нам хавтгайрсан халамжийг дэмждэггүй. Гэхдээ халамжлах ёстой хүмүүсээ халамжилсан шиг халамжлах ёстой" гэлээ.

Мэдээж санхүүжилтын асуудал яригдана. Тиймээс стратегийн ордуудыг эдийн засгийн эргэлтэд оруулснаар ахмадуудын тэтгэвэрийг нэмэгдүүлж болно гэж үзжээ. Цагаан суваргын орд тэтгэвэр нэмэхэд гол эх үүсвэр болно гэж Ардчилсан намын бүлгийнхэн тооцоолсон байна. Төр, хувийн хэвшил хамтарч ард иргэддээ үр өгөөжээ өгөх ёстой гэлээ. Залуу насаа улс орны бүтээн байгуулалтад зориулсан ахмадуудаа хэзээ ч орхиж болохгүй гэдгийг тэд онцолж байсан юм.