Монгол Улсын Ерөнхийлөгч Х.Баттулга орон нутгийн иргэдийн төлөөлөгчдийн хурлын сонгуульд саналаа өглөө. Тэрбээр “Үндсэн хуулийн эрх үүргийнхээ дагуу сонгуулиа өглөө. Орон нутгийн сонгууль бол маш чухал сонгууль. Яагаад гэвэл тухайн орон нутагт амьдарч байгаа иргэд, ажилчид, малчид нийгмийн харилцаа, ажил төрлийн холбоосоо хариуцуулах дарга нараа сонгох сонгууль учраас чухал гээд байгаа юм. Өдрийн 15 цагийн байдлаар нийт сонгогчдын ирц 35 хувьтай байна. Энэ бол бага байна гэсэн үг. Залуучууд маань сонгуульд идэвхитэй оролцоорой. Саналаа өгөөгүй иргэд сонгуулийн цаг дуусахаас өмнө саналаа өгч, иргэний үүргээ биелүүлэх хэрэгтэй байна. Сонгуульд идэвхитэй оролцоогүй байж дараа нь хариуцлага нэхэх нь уялдаагүй асуудал болоод байна.

Жишээ нь, нийслэл дээр хүүхдийн шар автобус худалдаж авсан асуудал дээр үнийн хувьд маргаан гараад байна. 45 мянга, 50 мянга, 130 мянган ам.доллар гээд. Энэ юу хэлж байна гэхээр, хэрвээ Нийслэлийн иргэдийн төлөөлөгчдийн хурал олон намын тогтолцоотой, авч байгаа тендерт нь хяналт тавидаг байсан бол ийм маргаан гарч, иргэдийг талцуулахгүй байх байлаа. Өөрчлөлтийг сонгуулиар хийдэг Ардчиллын алтан зарчим бий. Тийм учраас иргэд маань сонгуульд идэвхитэй оролцож, өөрчлөлт хийх хэрэгтэй байна. Амжилт хүсье” гэлээ.