Засгийн газрын Хэрэг эрхлэх газрын дарга, Төрийн албаны зөвлөлийн даргын хамтарсан 2021 оны есдүгээр сарын 30-ны өдрийн 72/188 тушаалаар байгуулагдсан Ажлын хэсэг Байгаль орчин, аялал жуулчлалын яаманд ажиллаж байна.

Тус ажлын хэсэг нь төрийн байгууллага, удирдлагуудын үйл ажиллагаатай танилцаж, хуулиар хүлээсэн чиг үүргээ хэрэгжүүлж байгаа байдалд үнэлгээ өгөх, төрийн жинхэнэ албан хаагчийг 2019, 2020, 2021 онд сонгон шалгаруулж, томилсон үйл ажиллагаанд хяналт, шалгалт хийх, хүний нөөцийн чиглэлээр 2019, 2020, 2021 онд гаргасан шийдвэрийн хууль зүйн үндэслэлийг хянах, дүгнэлт гаргах зэрэг үүрэгтэй юм. Гаргасан дүгнэлтүүдийг ТАЗ болон Засгийн газрын хуралдаанд оруулж танилцуулах аж.

Энэхүү ажлын хэсэг нь Төрийн албаны зөвлөл, ЗГХЭГ-ын албан хаагч нараас бүрдсэн 23 хүний бүрэлдэхүүнтэй бөгөөд Удирдамжийн дагуу бол тус Ажлын хэсэг БОАЖЯ, БШУЯ, Соёлын яам, ЭМЯ, нийслэл, Булган, Говь-Алтай, Дундговь, Өмнөговь, Хөвсгөл аймгийн ИТХ-ын Тэргүүлэгчдийн ажлын алба, Засаг даргын Тамгын газар, Засаг даргын эрхлэх асуудлын хүрээний агентлагууд дээр ажиллах юм байна.

            Байгаль орчин, аялал жуулчлалын сайд Б.Бат-Эрдэнэ, Төрийн нарийн бичгийн дарга Э.Баттулга нар тус яамны газар, хэлтсийн дарга нарын хамт өнөөдөр тус Ажлын хэсгийн ахлагч, Төрийн албаны зөвлөлийн гишүүн Б.Идэрчулуун, ЗГХЭГ-ийн Хяналт-шинжилгээ, дотоод аудитын газрын дарга Э.Бат-Идэр нарын албаны төлөөлөлтэй уулзлаа.

            Уулзалтын үеэр БОАЖ-ын сайд Б.Бат-Эрдэнэ яамны газар, хэлтсийн дарга нарт шалгалтын Ажлын хэсэгт бүх бичиг баримтыг саадгүй үзүүлэх чиглэл өгөөд аливаа байдлаар бичиг баримт нуух, ажлын хэсгийн гишүүдийг төөрөгдүүлсэн үйл явдал болбол хуулийн дагуу зохих арга хэмжээ авахыг Төрийн нарийн бичгийн дарга Э.Баттулгад үүрэг болгосон юм. Мөн Ажлын хэсэгт чин шударгаар хэн нэгний нөлөөнд орохгүй ажиллаж, хууль дагаж мөрдөөгүй албан тушаалтнууд байвал зохих шийдвэрийг гаргаж бидний ажилд туслалцаа үзүүлнэ үү гэсэн хүсэлт тавилаа.

            Төрийн албаны зөвлөлийн гишүүн Б.Идэрчулуун “Бид 2019 оноос хойш өмнөх хоёр ч сайдад албан бичгээр хандаж байсан, удирдамжаа ч явуулж байлаа. Миний чээжээр мэдэж байгаагаар танай яаманд хууль бусаар ажил үүргээсээ буусан гурван хүний асуудал байсан. В.Жавзан, Б.Оюунсанаагийн асуудал шийдэгдсэн юм байна. Говийн сав газрын захиргааны дарга байсан Б.Ялалтбаяр үлдчихээд байгаа юм билээ. Шинэчилсэн Төрийн албаны тухай хуулиар бидний тавьж байгаа зорилго бол ёс зүйтэй, сахилга хариуцлагатай, ур чадвар нь шаардлага хангасан хүнийг л ажиллуулах. Төрийн албаны зөвлөл эрхэм төрийн албаны дарга, албан хаагчдаас хүсэх ганцхан зүйл бол хууль мөрдөж ажиллах юм. Танай ТНБД бол төрийн албаны мэргэшсэн албан хаагч. Б.Бат-Эрдэнэ сайдын хувьд хууль хэрэгжүүлэх гэж өөрөө жинхэнэ гар бие зүтгэж байсан хүний хувьд энэ зовлонг ойлгох байх гэж бодож байна. Төрийн албан хаагчийн хориглосон зүйлийг Төрийн албаны тухай хуулийн 39, 37 дүгээр зүйлд заасан байдаг. Үүний хэрэгжилтийг харна. Хэрэв энэ дунд зөрүү буруу юм явах юм бол томилох эрх бүхий албан тушаалтныг ажлаас чөлөөлөх, улс төрийн албан хаагчийг огцруулах мэдэгдлийг томилох эрх бүхий албан тушаалтанд нь явуулах эрхийг хуульчилсан байдаг” гэсэн юм.

БОАЖ-ын сайд Б.Бат-Эрдэнэ “2019 онд батлагдсан шинэчилсэн Төрийн албаны тухай хуулиар маш олон харилцааг ойлгомжтой болгож өгсөн. Би хуулийн хэрэгжилт дээр хяналт тавьж ажиллаж ирсэн хүний хувьд өнөөдрийн байгаа мэдрэмжээр шалгалтыг зайлшгүй оруулах шаардлагатай. Хурдан хугацаанд орж ирж байгаад туйлын баяртай байна. Ажлаа хүлээж авснаас хойш нэг албан хаагч төрийн албаны шалгалтаа өгч тэнцээд орон тоон дээрээ жинхэлсэн. Бусад нь түр болон үүрэг гүйцэтгэгч байна. Төрийн албан хаагчийн шалгалтаа өгсөн мөртлөө ажлын байран дээрээ тавигдаагүй албан хаагчид бас байна. Томилох асуудлыг яаралтай хийх үүргийг Төрийн нарийн бичгийн даргад өгсөн. Б.Оюунсанаагийн асуудал бол шүүх дээр явж байсан. Шүүхийн шатанд БОАЖЯ-наас давж заалдсаныг эвлэрлийн шугамаар шийдвэрлэж Б.Оюунсанааг шууд ажлын байран дээр нь тавьсан байгаа. Б.Ялалтбаярын хувьд яаралтай ажлын байран дээр нь тавих хэрэгтэй. В.Жавзан даргын хувьд Хяналт-шинжилгээ, үнэлгээ, дотоод аудитын газрын даргаар ажиллаж байсныг бид Төрийн захиргаа удирдлагын газрын дарга руу шилжүүлж ажиллуулж байгаа. Учир нь Хяналт-шинжилгээ, үнэлгээ, дотоод аудитын газрын даргаар Авлигатай тэмцэх газраас албан тушаалтныг сэлгэн ажиллуулахаар ярьж байна. Ер нь төрийн албанд байгаа бугшсан системийг бид сайн цэгцлэх хэрэгтэй гэж харж байгаа. АТГ-аас гардаг Шударга байдлын үнэлгээгээр БОАЖЯ доороосоо гуравдугаарт орсон. Дотоодод ужгирсан авлигын системийг шинэ сайд, дэд сайд, ТНБД ирснээр тасалж чадахгүй. Харин АТГ-аас сэлгэн ажиллуулж байгаа албан тушаалтан авлигатай холбоотой асуудлыг таслан зогсоож, энэ чиглэлд тодорхой шийдлүүд гаргаасай гэж хүсэж байгаа. Үүнийгээ ч бид АТГ-т шууд илэрхийлсэн. АТГ-аас гаргадаг дараагийн Шударга байдлын үнэлгээгээр доороосоо гуравт биш ядаж эхний арван байрт орох шаардлагатай гэж үзэж байгаа” гэсэн юм.

            Уулзалтын төгсгөлд Ажлын хэсгийн ахлагч, Төрийн албаны зөвлөлийн гишүүн Б.Идэрчулуун “100 хувь санал нэг байна. Та нарын мэдэж байгаа сайн, муу бүх мэдээлэл Төрийн албаны зөвлөлд бий. БОАЖ-ын сайд тус яамны ТНБД гэх мэт бүрэлдэхүүнээр нь ингэж сольсон нь бол энэ Засгийн газар гаргаж байгаа алдаан дээрээ том дүгнэлт хийжээ гэж иргэд олон нийт ч тэр, Төрийн албаны зөвлөл ч харж байгаа. Төрийн албанд хуульд тавьж байгаа шаардлагыг хангасан хүн ажиллана. Ажлаа зохих ёсоор гүйцэтгэж чадахгүй бол ажлаа өгнө. Өнгөрсөн ганцхан жилд бид цар тахлын дундуур яваад 5277 хүний хувийн хэрэг, бүх материал, томилсон, чөлөөлсөн тушаалыг эмэрч үзсэн. Тэднээс 1100 гаруй нь хууль бус томилгоо байгаа юм. Үндсэндээ тавны нэг нь гэсэн үг. Одоо энэ шалгалтаар ямар ч байсан хаана нь алдаа догол байгаа юм гэдэг нь ширээн дээр гарч ирж таарна. Энэ бол шийдэл хийх гэж явж байгаа болохоос бид хэн нэгний улыг шагайж яваа юм биш. Яг энэ шаардлагыг би танай өмнөх хоёр сайдад хоёуланд нь явуулж байсан. 2019 оны нэгдүгээр сарын 1-ээс хойш миний нэртэй болон Төрийн албаны зөвлөлөөс ирүүлсэн албан бичгүүдтэй танилцаарай гэж хүсье” гэлээ.