АТГ-аас өнөөдөр Монгол Улсын Хөгжлийн банкнаас зарласан чанаргүй зээлдэгчидтэй холбоотой асуудлаар мэдээлэл хийлээ. Тус байгууллагаас чанаргүй ангилалд орсон зээлдэгчдээс гадна зээл олгох шийдвэр гаргасан албан тушаалтнуудыг ч холбогдуулан шалгаж байгаа юм.

Мэдээллийн үеэр, АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэн  “Хөгжлийн банкны 52 зээлдэгчид холбогдох мэдээллийг АТГ нэгдүгээр сарын 28-ны өдөр хүлээн авсан. Энэ хүрээнд уг зээлүүд холбогдох хууль тогтоомжуудад нийцсэн эсэх, эрх мэдэл албан тушаалаа урвуулан ашигласан, хахууль авсан эсэх, улмаар төрд хохирол учруулсан эсэхийг тогтоохоор ажиллаж байна. Улмаар зээлийг эргэн төлүүлэх, хөрөнгө захиран зарцуулах эрхэд хязгаарлалт тогтоох, нуугдмал хөрөнгийг илрүүлэх, хохирлыг барагдуулах чиглэлд хяналт шалгалт хийж байна. Нэгдүгээр сарын 28-наас хойш 8.5 тэрбум төгрөгийн зээл Хөгжлийн банканд эргэн төлөгдсөн байна. Бид зөвхөн зээлдэгч биш зээл гаргахад оролцсон албан тушаалтнуудын хөдлөх болон үл хөдлөх хөрөнгийг битүүмжлэх, захиран зарцуулах эрхэд нь хязгаарлалт тогтоон ажиллаж байна. Иргэддээ анхааруулахад, хөдлөх болон үл хөдлөх хөрөнгө худалдан авахдаа эх үүсвэр, барьцаанд байгаа эсэх, маргаантай, хязгаарлалт тогтоогдсон эсэхийг нь шалгах хэрэгтэй байна. Жишээлбэл, “Гантиг вилла” төслийн есөн блок нь Хөгжлийн банкны барьцаатай. Хязгаарлалт тогтоосон. Энэ нь УИХ-ын гишүүн асан Б.Ундармаагийн хамаарал бүхий компани барьсан барилга” гэлээ.

Мөн уг ажлын хүрээнд АТГ-аас 186 үл хөдлөх хөрөнгө, 124 тээврийн хэрэгсэл, Үйлдвэрийн нэг байр, Нэг лиценз, 13 дансыг битүүмжилж, хязгаарлалт тогтоожээ.