Монгол Улсын Ерөнхий сайд Л.Оюун-Эрдэнэ БНХАУ-ын нийслэл Бээжин хотод зохион байгуулж байгаа өвлийн XXIV олимпын нээлтийн ажиллагаанд оролцов. Уг арга хэмжээнд нийт 32 улсын төр, засгийн тэргүүн, олон улсын байгууллагын удирдлага оролцож байгаа юм.

БНХАУ-ын нийслэл Бээжин хот нь өвөл, зуны олимпыг зохион байгуулсан анхны хот болж байна. Биатлон, уран гулгалт, бобслей, кёрлинг, хоккей, чарга, тэшүүр, цана зэрэг үндсэн долоон спортын 15 төрөлд 109 багц медалийн төлөө 3000 гаруй тамирчин өрсөлдөнө.  Харин Монгол Улсын хувьд 1964 онд анхны олимпдоо оролцсоноос хойш 15 дахь наадамдаа оролцож байна.

Монгол Улсын Ерөнхий сайд Л.Оюун-Эрдэнэ "Хүн төрөлхтөн цар тахалтай тэмцэж байна. Ийм амаргүй үед Токиогийн олимпыг зохин байгуулсан Японы ард түмэнтэй Монголын ард түмэн болон Засгийн газар сэтгэл санаагаар нэг гэдгээ илэрхийлж, Монгол Улс зуны олимпод оролцсон.

           Энэ удаа Монгол Улсын мөнхийн хоёр хөрш орны нэг БНХАУ өвлийн олимпыг цар тахлын нэн амаргүй цаг үед амжилттай зохион байгуулж, хүн төрөлхтөний өмнө хүлээсэн үүргээ амжилттай биелүүлж байна. Энэ хүнд үед бид саахалт айлын санаа нэг гэдэгчилэн Монголын ард түмэн, Монголын төр, засаг сэтгэл санаагаар нэг гэдгээ илэрхийлж, Бээжингийн өвлийн олимпид оролцож байна. Манай улсаас гурван тамирчин цанын төрөлд оролцож буй. Нийт монголчуудынхаа өмнөөс гурван тамирчиндаа спортын өндөр амжилт хүсэн ерөөж байна.

Маргааш ажлын уулзалтууд эхэлнэ. Ажлын уулзалтуудаар олон зүйлийг төлөвлөсөн байгаа. Амжилттай болно гэдэгт итгэлтэй байна" гэжээ.

           Мөн өнөөдөр буюу 2022 оны хоёрдугаар сарын 5-нд Ерөнхий сайд Л.Оюун-Эрдэнэ БНХАУ-ын Төрийн Зөвлөлийн Ерөнхий сайд Ли Көчянтай албан ёсны уулзалт хийх юм.